Kryeministri i Izraelit Benjamin Netanyahu është takuar këtë të premte me zyrtarë të lartë të sigurisë për të diskutuar mbi rritjen e dhunës nga kolonët izraelitë në Bregun Perëndimor, ndërsa akuza të reja kanë qarkulluar se kolonë izraelitë kishin hedhur gurë mbi automjete palestineze që kalonin në fshatin Huwara.

Kryetari i Huwara-s, Jihad Ouda, tha se hedhja e gurëve u pasua shpejt nga një zjarr i madh në një vendgrumbullim skrapi aty pranë. Flakët ndriçuan qiellin e mbrëmjes dhe dërguan shtëllunga të mëdha tymi në ajër, siç treguan imazhet dhe videot në rrjetet sociale. Ushtria tha se kishte raportime se izraelitët e kishin vënë zjarrin dhe se policia po hetonte.

Në takimin e sotëm, sipas Associated Press, kryeministri Benjamin Netanyahu dhe zyrtarë nga ushtria, shërbimi i sigurisë së brendshme Shin Bet dhe policia diskutuan rritjen e fundit të dhunës dhe propozimet për ta frenuar atë, sipas një zyrtari izraelit që foli në kushte anonimiteti pasi nuk ishte i lejuar të fliste për një mbledhje me dyer të mbyllura. Zyrtari tha se propozimet përfshinin dërgimin e kolonëve të dhunshëm në programe edukimi.

Sulmet e kolonëve u shtuan gjatë sezonit të vjeljes së ullinjve palestinezë në tetor dhe në fillim të nëntorit dhe kanë vazhduar që atëherë. Netanyahu i ka quajtur autorët “një grusht ekstremistësh” dhe u ka bërë thirrje organeve të rendit t’i ndjekin për “përpjekjen për të marrë ligjin në duart e tyre”. Por grupet e të drejtave dhe palestinezët thonë se problemi është shumë më i madh se disa individë dhe sulmet janë bërë një fenomen i përditshëm në gjithë territorin.

Ndërkohë, Ministria e Shëndetësisë palestineze tha se dy të rinj palestinezë, 18 dhe 16 vjeç, u vranë nga të shtënat izraelite gjatë natës. Rrethanat e të shtënave nuk ishin menjëherë të qarta. Policia izraelite nuk reagoi menjëherë kur u pyet për koment.

Gurë mbi makinat palestineze, vendgrumbullimi i skrapit i djegur

Mohammad Dalal, pronari i pikës së grumbullimit të skrapit së djegur në Huwara, tha se dëshmitarët i kishin treguar se kolonë izraelitë u panë duke hedhur gurë të enjten nga një mbikalim mbi automjetet palestineze që kalonin poshtë. Ai tha se zjarri i madh nisi menjëherë pas kësaj.

Ai shtoi se ushtria izraelite mbërriti më vonë për t’i larguar autorët.
“Po të mos kishte larguar ushtria, ata do të kishin bërë edhe më shumë,” tha Dalal. “Këta kolonë po shkaktojnë shkatërrim kudo këtu… Ku mund të shkojmë? Ne duam të qëndrojmë të palëkundur në tokën tonë, pavarësisht gjithçkaje.”

Një njësi hetimi izraelite e përbërë nga ushtarë dhe oficerë policie kufitare të premten mblodhi prova nëlidhje me incidentin, sipas një ekipi të Associated Press që iu kërkua të largohej nga hetuesit.

E pyetur për incidentin, ushtria izraelite tha se kishte dërguar ushtarë në zonë pasi mori raportime se kolonët po hidhnin gurë mbi makinat palestineze. Raportime të tjera tregonin se “disa” civilë izraelitë kishin vënë zjarr dhe kishin dëmtuar pronat në zonë. Ushtria tha se ushtarët kontrolluan zonën por nuk gjetën asnjë të dyshuar dhe se policia po merret tani me rastin.

Huwara ka qenë objektiv i shumë sulmeve vitet e fundit. Në shkurt 2023, dhjetëra kolonë izraelitë kryen një sulm të dhunshëm atje, duke djegur dhjetëra makina dhe shtëpi pasi dy kolonë u vranë nga një palestinez i armatosur. Mjekët palestinezë thanë se një burrë u vra dhe katër të tjerë u plagosën rëndë.

Të dhënat e zyrës humanitare të OKB-së tregojnë se 2 mijë e 920 sulme nga kolonët izraelitë ndodhën midis janarit dhe tetorit të këtij viti.