Grupi i Shtatë vendeve (G7), që udhëheqin demokracitë e industrializuara, po shtyn përpara një mandat të Këshillit të Sigurimit të OKB-së, për të siguruar zbatimin e shpejtë të planit të paqes për Rripin e Gazës, tha Ministri i Jashtëm gjerman Johann Wadephul.

"Na duhet një mandat nga Këshilli i Sigurimit, në mënyrë që Hamasi të çarmatoset dhe një forcë ndërkombëtare sigurie të marrë përgjegjësinë", tha Wadephul të mërkurën në ditën e dytë të takimit të ministrave të jashtëm të G7 në Niagara-on-the-Lake në Kanadanë juglindore.

Përveç Gjermanisë dhe Shteteve të Bashkuara, vendet e G7 përfshijnë Francën, Italinë, Japoninë, Mbretërinë e Bashkuar dhe Kanadanë. SHBA-të, Franca dhe Mbretëria e Bashkuar janë të gjitha anëtare të përhershme të Këshillit të Sigurimit të OKB-së, së bashku me Kinën dhe Rusinë.

Wadephul tha se çështja u diskutua në një seancë fillestare pune të takimit të G7, të martën në mbrëmje. Ai tha se ministrat e jashtëm ranë dakord se një mandat i OKB-së është i nevojshëm, dhe duhet të sigurohet sa më shpejt të jetë e mundur.

Por, paralajmëroi ai, "rezolutat nuk mund të urdhërohen, ato duhet të negociohen me vështirësi".

Ishte bërë "krejtësisht e qartë se koha po ecën dhe se na duhet një strukturë sigurie sa më shpejt të jetë e mundur, për të siguruar rendin në Rripin e Gazës", tha Wadephul.

Një forcë e tillë sigurie do të ishte në gjendje të kontrollonte militantët palestinezë të Hamasit dhe grupet e tjera të armatosura në Rripin e Gazës, vetëm nëse ka një mandat të qartë për vendet që dërgojnë trupa, tha ministri i jashtëm gjerman.

Çështja se cilat vende mund të ofrojnë trupa për një njësi të tillë sigurie, është objekt i negociatave të vazhdueshme me Izraelin./ DPA News.