Më 10 tetor 2025, një operacion ndërkombëtar i koduar ‘SIMCARTEL’, i zhvilluar në Letoni, çoi në arrestimin e 5 shtetasve letonezë të dyshuar si pjesë e një rrjeti të sofistikuar kriminal që ofronte shërbime për të fshehur identitetin e kriminelëve në internet. Po ashtu, u arrestuan edhe dy persona të tjerë, u sekuestruan pesë serverë dhe rreth 1 200 pajisje SIM-box së bashku me 40 000 karta SIM aktive.

Hetimet, të kryera nga autoritetet e Austrisë, Estonisë dhe Letonisë, në bashkëpunim me Europol dhe Eurojust, kanë zbuluar mbi 3 200 raste mashtrimi kibernetik, kryesisht në Austri (1 700 raste) dhe Letoni (1 500 raste), me një dëm financiar që kap vlerën e miliona eurove. Vetëm në Austri, humbjet përllogariten në rreth 4.5 milionë euro, ndërsa në Letoni 420 000 euro.

Rezultatet e operacionit ‘SIMCARTEL’:

26 kontrolle në banesa dhe ambiente të tjera;

5 persona të arrestuar;

Rreth 1 200 pajisje SIM-box të sekuestruara, me mbi 40 000 karta SIM aktive;

Qindra mijëra karta SIM shtesë të sekuestruara;

5 serverë të rrjetit kriminal të rrëzuar;

2 faqe interneti të sekuestruara nga policia: gogetsms.com dhe apisim.com, me vendosjen e faqeve informuese për publikun;

431 000 euro në llogari bankare të ngrira;

333 000 dollarë në llogari kriptomonedhash të ngrira;

4 automjete luksoze të sekuestruara.

Hetimet tregojnë se rrjeti ka ndihmuar në krijimin e mbi 49 milionë llogarive online të përdorura për qëllime kriminale. Shërbimi ilegal ofronte përdorimin e numrave të telefonit të regjistruar në mbi 80 vende të botës, duke u dhënë mundësi kriminelëve të fshihnin identitetin e tyre dhe të kryenin një sërë krimesh në internet.

Krime të shumta të lehtësuara nga shërbimi kriminal

Përdorimi i pajisjeve SIM-box dhe numrave të telefonit të huaj u mundësoi kriminelëve:

Të kryenin mashtrime në tregje online të sendeve të dorës së dytë;

Të realizonin skemën ‘vajza/djalë jam’ përmes WhatsApp-it për të mashtruar prindërit me kërkesa urgjente për para;

Të kryenin mashtrime investimi duke marrë kontrollin e pajisjeve të viktimave;

Të krijonin dyqane dhe faqe bankare false për të mashtruar blerësit;

Të paraqiteshin si policë të rremë dhe të mashtronin qytetarë, veçanërisht ata rusishtfolës.

Strukturë kriminale e sofistikuar dhe teknologji e avancuar

Rrjeti funksiononte si një shërbim ‘krim-si-shërbim’ (Crime-as-a-Service) me një faqe interneti të dizajnuar në mënyrë profesionale dhe me përfshirjen e një organizimi të mirë për mbledhjen e mijëra kartave SIM nga rreth 80 vende. Një nga organizatorët kryesorë kishte qenë më parë nën hetim në Estoni për zjarrvënie dhe zhvatje.

Bashkëpunim i ngushtë ndërkombëtar

Operacioni u mbështet nga Europol dhe Eurojust, të cilët ndihmuan në planifikimin, mbështetjen teknike dhe financiare, si dhe në analizat inteligjente dhe sekuestrimin e provave dixhitale.

Bashkëpunimi përfshiu agjenci të shumta:

Austria: Shërbimi Federal i Hetimit Penal, Prokuroria e Vjenës

Estonia: Policia dhe Prokuroria e Qarkut Verior

Finlanda: Njësia Kombëtare për Krime Kibernetike, Byroja Kombëtare e Hetimeve

Letonia: Policia Shtetërore dhe Prokuroritë e Rajonit të Rīgës

Operacioni u realizua me mbështetjen teknike edhe të Fondacionit Shadowserver, i specializuar në luftën kundër abuzimeve në internet.

Ky operacion është një nga goditjet më të mëdha kundër shërbimeve të krimit kibernetik që ofrojnë mjete për të fshehur gjurmët digjitale dhe për të mashtruar qytetarët anembanë Evropës. Hetimet vazhdojnë, ndërsa përmasat e plota të këtij rrjeti kriminal janë ende në zbardhje.