Presidenti ukrainas Volodymyr Zelensky duket se ka dalë duarbosh nga takimi në Shtëpinë e Bardhë, pasi presidenti amerikan Donald Trump la të kuptohej se nuk ishte ende i gatshëm të furnizonte Ukrainën me raketat e kërkuara Tomahawk.

Pas një bisede dypalëshe të përzemërt, Zelensky tha se ai dhe Trump kishin diskutuar për raketat me rreze të gjatë veprimi, por kishin vendosur të mos bënin deklarata publike për këtë çështje, "sepse Shtetet e Bashkuara nuk duan përshkallëzim".

Pas takimit, Trump postoi në rrjetet sociale një thirrje që Kievi dhe Moska "të ndalojnë aty ku janë" dhe të përfundojnë luftën.

Takimi Trump-Zelensky ndodhi një ditë pasi Trump zhvilloi një telefonatë me presidentin rus Vladimir Putin, me të cilin u dakordësua të takohet së shpejti në Hungari.

Zelensky beson se përdorimi i raketave Tomahawk për të goditur objektiva të naftës dhe energjisë në Rusi do të dobësonte ndjeshëm ekonominë e luftës së Putinit.

Megjithëse Trump nuk e përjashtoi mundësinë, qëndrimi i tij në Shtëpinë e Bardhë të premten ishte i paqartë dhe i rezervuar.

"Shpresoj që të mos kenë nevojë për to, shpresoj që të mbyllim luftën pa qenë nevoja të mendojmë për Tomahawk," tha presidenti amerikan, duke shtuar se Amerika kishte nevojë për ato armë.

Trump pranoi se dërgimi i raketave do të ishte "përshkallëzim, por do të flasim për këtë".

Kur u pyet nga BBC nëse raketat Tomahawk e kishin shtyrë Putinin të kërkonte një takim me Trump, presidenti amerikan u përgjigj: "Kërcënimi i tyre është i mirë, por ai kërcënim është gjithmonë aty."

Zelensky sugjeroi që Ukraina mund të ofronte dronë në këmbim të raketave Tomahawk, një propozim që shkaktoi buzëqeshje dhe miratim nga Trump.

Zelensky gjithashtu komplimentoi Trump për rolin e tij në sigurimin e fazës së parë të një marrëveshjeje paqeje në Lindjen e Mesme, duke sugjeruar se ai mund të ndërtonte mbi atë sukses për të ndihmuar në përfundimin e luftës së Rusisë kundër Ukrainës.

Jashtë pas takimit, një gazetar e pyeti Zelenskyn nëse mendonte se Putini dëshironte një marrëveshje apo po kërkonte kohë me takimin e planifikuar me Trump në Budapest.

"Nuk e di," tha ai, duke shtuar se perspektiva që Ukraina të kishte raketat Tomahawk i kishte bërë rusët të "tremben, sepse janë armë të fuqishme".

I pyetur nëse po largohej nga Uashingtoni më optimist për marrjen e raketave, ai u përgjigj: "Jam realist."

Në një postim në X (ish-Twitter), Zelensky tha se kishte telefonuar udhëheqësit evropianë për t'u ndarë detaje nga takimi me Trump, duke shtuar se "prioriteti kryesor tani është të mbrohen sa më shumë jetë, të garantohet siguria për Ukrainën dhe të forcohet e gjithë Evropa".

Kryeministri britanik Keir Starmer e quajti telefonatën me liderët evropianë "produktive" dhe premtoi se "Britania do të vazhdojë të ofrojë ndihmë humanitare dhe mbështetje ushtarake".

Në ditët e fundit, Trump kishte shfaqur një hapje ndaj idesë për të shitur raketat Tomahawk, megjithëse Putini paralajmëroi se një lëvizje e tillë do të përkeqësonte më tej marrëdhëniet SHBA-Rusi.

Të enjten, Trump tha se kishte pasur "përparim të madh" gjatë një telefonate me Putinin, me të cilin u ra dakord të takohej ballë për ballë së shpejti në Hungari.

Kur u pyet nëse Zelensky do të përfshihej në ato bisedime, Trump, para takimit me presidentin ukrainas, tha se kishte "gjak të keq" mes Putinit dhe Zelenskyt.

"Duam ta bëjmë të rehatshme për të gjithë," tha ai. "Do të përfshihemi në një treshe, por mund të jetë e ndarë." Ai shtoi se të tre liderët "duhet të takohen".

Trump tha se telefonata e tij me Putinin, e para që nga mesi i gushtit, ishte "shumë produktive", dhe se ekipet nga Uashingtoni dhe Moska do të takohen javën tjetër.

Ai kishte shpresuar që një samit ballë për ballë në Alaskë në gusht do të bindte Putinin të hynte në bisedime paqeje të plota për të përfunduar luftën, por takimi nuk solli ndonjë përparim vendimtar.

Ata folën sërish disa ditë më vonë, kur Trump ndërpreu një takim me Zelenskyn dhe liderë evropianë për të telefonuar Putinin.

Ndërkohë në Ukrainë, BBC foli të premten me një çift që po riparonin dyqanin e vogël të tyre në një periferi të Kievit, pasi ishte shkatërruar nga raketat ruse muajin e kaluar.

Kur pronari i dyqanit, Volodymyr, u pyet për takimin e ardhshëm të Trump me Putinin, ai filloi të thoshte: "Ne e vlerësojmë çdo mbështetje."

Por u largua pak çaste, ndërsa sytë iu mbushën me lot. Pas një pauze të gjatë, u përmblodh dhe rifilloi:

"E vërteta dhe demokracia do të fitojnë, dhe gjithë terrorizmi e e keqja do të zhduken," tha ai. "Ne thjesht duam të jetojmë, nuk duam të dorëzohemi, duam vetëm të na lënë të qetë."