Shpërthimet e tubacionve Nord Stream, Italia bllokon ekstradimin e ukrainasit në Gjermani

Gjykata e Lartë e Italisë ka refuzuar ekstradimin në Gjermani të një ukrainasi të arrestuar nën dyshimin për shkaktimin e shpërthimeve që dëmtuan tubacionet e gazit Nord Stream në vitin 2022, tha avokati i tij të enjten.

Gjykata e Kasacionit e Italisë anuloi të mërkurën një vendim të mëparshëm nga një gjykatë apeli e Bolonjës, e cila kishte urdhëruar ekstradimin në Gjermani të të dyshuarit 49-vjeçar, Serhii Kuznietsov.

Gjykata e lartë italiane tani ka kërkuar që një panel tjetër i së njëjtës gjykatë apeli të rivlerësojë çështjen, tha avokati i Kuznietsov, Nicola Canestrini.

Canestrini tha se motivimet e vendimit të gjykatës së Kasacionit nuk janë paraqitur ende dhe priten në javët në vijim.

"Ndërkohë, do të vlerësoj nëse ekzistojnë kushtet për të kërkuar lirimin e klientit tim, pasi baza ligjore për paraburgim ka pushuar së ekzistuari", shtoi Canestrini.

Shpërthimet dëmtuan tubacionin Nord Stream 1, i cili transportonte gaz natyror rus në Gjermani nën Detin Baltik deri në ndërprerjen e furnizimeve nga Rusia në fund të gushtit 2022.

Ata dëmtuan gjithashtu tubacionin paralel Nord Stream 2, i cili nuk hyri kurrë në shërbim sepse Gjermania pezulloi procesin e certifikimit pak para se Rusia të pushtonte Ukrainën në shkurt 2022.

Prokurorët gjermanë hapën një hetim pas shpërthimeve dhe zyrtarët kanë theksuar interesin për të sqaruar atë që ndodhi.

Kuznietsov u arrestua me një urdhër arresti evropian më 21 gusht, në një kamping pranë qytetit bregdetar të Riminit në Adriatik, ku ai ishte me pushime me familjen e tij.

Gjatë seancës së parë dëgjimore ku konfirmohej paraburgimi i tij, Kuznietsov mohoi çdo përfshirje në shpërthime, duke thënë se ndodhej në Ukrainë ku shërbente në ushtri si kapiten në kohën e shpërthimeve.

Prokurorët gjermanë pretendojnë se Kuznietsov organizoi dhe kreu shpërthimin e të paktën katër bombave midis 14 dhe 27 kilogramëve në një thellësi prej 70-80 metrash në Detin Baltik pranë ishullit danez Bornholm më 26 shtator 2022, sipas dokumenteve të ekstradimit.

Autoritetet polake arrestuan një tjetër shtetas ukrainas muajin e kaluar, i cili dyshohet gjithashtu për përfshirje në shpërthimet nënujore.

Gjykata e Qarkut të Varshavës pritet të vendosë për ekstradimin e tij të premten, por vendimi mund të apelohet.

Kryeministri Donald Tusk tha në fillim të tetorit se nuk ishte “në interes të Polonisë” ekstradimi i burrit./ Euronews.