Pas një rekordi prej 36.9 milionë vizitorësh ndërkombëtarë vitin e kaluar, Japonia ka miratuar taksën më të lartë të akomodimit në historinë e saj, që do të hyjë në fuqi vitin e ardhshëm në qytetin e Kiotos.

Sipas Ministrisë së Punëve të Brendshme dhe Komunikacionit, taksa e re — e propozuar fillimisht në mars — synon të promovojë turizmin e qëndrueshëm dhe të ndihmojë në menaxhimin e mbingarkesës turistike që ka prekur qytetin historik.

Aktualisht, taksa e akomodimit në Kioto është e kufizuar në 1,000 jen (rreth 5.68 euro) për natë, por me ndryshimet e miratuara, të ardhurat vjetore nga kjo taksë pritet të rriten nga 5.2 miliardë jen (31.8 milionë euro) në 12.6 miliardë jen (71.5 milionë euro).

Sa do të paguajnë vizitorët?

Shuma e taksës do të varet nga çmimi i akomodimit, sipas një sistemi të ri të shkallëzuar:

• 10,000 jen (56.84 €) për dhomat që kushtojnë mbi 100,000 jen/natë

• 4,000 jen (22.73 €) për dhomat midis 50,000 dhe 99,999 jen

• 1,000 jen (5.68 €) për dhomat midis 20,000 dhe 49,999 jen

• 400 jen (2.27 €) për dhomat midis 6,000 dhe 19,999 jen

• 200 jen (1.14 €) për dhomat nën 6,000 jen

Kjo është rritja e parë që nga tetori 2018, kur u fut për herë të parë taksa e akomodimit në qytet.

Mbiturizmi, sfida e re e Japonisë

Popullariteti në rritje i Japonisë ka sjellë shqetësime për ndikimin në mjedis dhe komunitetet lokale.
Në 2024, numri i vizitorëve ndërkombëtarë arriti në 36.9 milionë, një rritje prej 15.6% krahasuar me rekordin e mëparshëm në 2019.

Në destinacione si Mali Fuji, autoritetet kanë ngritur alarmin për ndotjen dhe bllokimet e trafikut njerëzor, ndërsa po përgatiten plane për zgjerimin e infrastrukturës turistike.

Qëllimi: turizëm i qëndrueshëm, jo dekurajues
Ekspertët theksojnë se taksa e re nuk synon të pengojë turistët, por të sigurojë që ata të kontribuojnë në menaxhimin e ndikimit të turizmit.
“Këto taksa rrallë kanë për qëllim të dekurajojnë udhëtimet – ato janë të dizajnuara për të riinvestuar në gjërat që i bëjnë qytetet tërheqëse: ruajtjen e kulturës, transportin publik, pastërtinë dhe menaxhimin e vizitorëve,” – tha për Euronews Travel Nicholas Smith, Drejtor i Holidays Digital në Thomas Cook.

Sipas tij, udhëtarët që kërkojnë eksperienca autentike do ta shohin këtë masë si një kontribut pozitiv, që përmirëson cilësinë e përvojës së tyre dhe ndihmon komunitetet vendase.