Një grup mashtruesish të dyshuar në Brazil, të cilët përdorin reklama në Instagram që paraqesin imazhe të falsifikuara të supermodeles, Gisele Bundchen dhe personazheve të tjerë të famshëm, duket se kanë fituar miliona dollarë përmes mashtrimeve online, sipas hetuesve të policisë.

Autoritetet arrestuan katër të dyshuar të lidhur me skemën këtë javë dhe ngrinë asetet në pesë shtete në një hetim që zbuloi mbi 20 milionë reais (3.9 milionë dollarë) në fonde të dyshimta të identifikuara nga organi federal kundër pastrimit të parave COAF.

Operacioni shënon një nga përpjekjet e para në Brazil për të kundërshtuar përdorimin në rritje të mjeteve të inteligjencës artificiale, për të manipuluar imazhet dhe videot e personazheve të famshëm për mashtrime online.

Gjykata Supreme e Brazilit vendosi në qershor se platformat e mediave sociale mund të mbahen përgjegjëse për reklamat kriminale të postuara nga përdoruesit, nëse nuk veprojnë shpejt për të hequr përmbajtjen, edhe pa një urdhër gjykate.

Pronari i Instagram-it, Meta tha se politikat e saj ndalojnë "reklamat që përdorin në mënyrë mashtruese figura publike për të tentuar të mashtrojnë njerëzit" dhe se i heq reklamat e tilla "kur zbulohen". Kompania shtoi në një deklaratë se ka "sisteme të specializuara për të zbuluar "karremin" e personazheve të famshëm, investon shumë në ekipe të trajnuara shqyrtimi, ndan këshilla për shmangien e mashtrimeve dhe ofron mjete për të raportuar shkelje të mundshme".

Bundchen nuk iu përgjigj një kërkese për koment. Ajo më parë i paralajmëroi ndjekësit për videot e rreme që qarkullonin në mediat sociale, duke përdorur imazhin e saj për të kryer mashtrime.

Hetimi i njoftuar këtë javë nga hetuesit e policisë në shtetin jugor të Rio Grande do Sul filloi në gusht 2024 pasi një viktimë raportoi se ishte mashtruar nga një reklamë në Instagram, që tregonte një video të modifikuar të Bundchen duke promovuar një produkt për kujdesin e lëkurës.

Një tjetër reklamë përdori ngjashmërinë e supermodeles për të premtuar një dhuratë valixhesh, me blerësit që paguanin tarifa transporti për artikujt që nuk mbërritën kurrë.

"Ne identifikuam se grupi kriminal kreu një sërë mashtrimesh të tjera, duke përfshirë falsifikime të personazheve të tjerë të famshëm dhe platforma bastesh të rreme", tha për Reuters Eibert Moreira Neto, kreu i njësisë së krimit kibernetik të Rio Grande do Sul.

Hetuesit po ngrenë akuza për pastrim parash dhe mashtrim online. Ata vunë re se shumica e viktimave humbën shuma të vogla, zakonisht nën 100 reais (19 dollarë), dhe nuk i raportuan krimet.

“Kjo krijoi një situatë të çoroditur në të cilën kriminelët gëzonin një lloj ‘imuniteti statistikor’. Ata e dinin se shumica e njerëzve nuk do t’i raportonin, kështu që vepruan në shkallë të gjerë pa frikë”, tha në një deklaratë Isadora Galian, nga njësia e krimit kibernetik./ Reuters.