Shërbimi britanik i inteligjencës së jashtme, MI6, ka lançuar një portal të ri në internetin e errët me emrin Silent Courier, me qëllim rekrutimin e spiunëve dhe mbledhjen e informacionit në mënyrë të sigurt nga informatorë potencialë në të gjithë botën, përfshirë Rusinë.

Sekretarja e Jashtme britanike, Yvette Cooper, deklaroi se platforma është pjesë e përpjekjeve të Mbretërisë së Bashkuar për t’u mbajtur një hap përpara kërcënimeve globale. “Agjencitë tona të inteligjencës punojnë pas skenave për të mbajtur të sigurt njerëzit britanikë. Tani po i forcojmë përpjekjet e tyre me teknologji të përparuar,” tha Cooper.

MI6 publikoi gjithashtu një seri videosh promovuese, duke shpjeguar se portalit mund t’i qasen informatorë që kanë të dhëna të ndjeshme mbi paqëndrueshmërinë globale ose aktivitetin armiqësor të inteligjencës. Udhëzimet theksojnë përdorimin e pajisjeve të pastra dhe të sigurta, si dhe përdorimin e shfletuesit Tor dhe VPN-ve për anonimitet.

Shefi në largim i MI6, Richard Moore, bëri thirrje veçanërisht për informatorët rusë që kanë të dhëna të ndjeshme, duke u ftuar të kontaktojnë agjencinë. Ai do të zëvendësohet nga Blaise Metreweli, gruaja e parë që do të drejtojë shërbimin në histori.

Lëvizja e MI6 vjen në vijim të fushatave të ngjashme të udhëhequra nga CIA në vitin 2023, që synonin rekrutimin e informatorëve rusë përmes mediave sociale.