Gjermania i heq imunitetin ligjvënësit të AfD-së, policia i bastis shtëpinë për shkak të akuzave për spiunazh nga Kina

Parlamenti gjerman i hoqi të enjten imunitetin ligjvënësit të ekstremit të djathtë Maximilian Krah, duke hapur rrugën për hetime penale ndaj tij për lidhje të dyshuara me Kinën dhe përfshirje në skandale korrupsioni.

Menjëherë pas vendimit, policia bastisi shtëpinë e Krah, si dhe zyrat e tij në Berlin, Dresden dhe Bruksel. Bastisjet u urdhëruan nga Gjykata e Lartë Rajonale e Dresdenit, raportoi agjencia gjermane e lajmeve DPA.

Hetimet lidhen me pagesa të dyshuara kineze ndaj Krah gjatë kohës kur ai ishte eurodeputet, të cilat mund të përfshijnë ryshfet dhe pastrim parash. Prokurorët po vlerësojnë nëse ka baza për ngritjen e akuzave.

Krah i ka mohuar akuzat. Megjithatë, figura e tij është e kontestuar edhe brenda partisë Alternativa për Gjermaninë (AfD). Ai u përjashtua nga lista për zgjedhjet e BE-së vitin e kaluar, pasi deklaroi në një intervistë se jo të gjithë anëtarët e SS naziste ishin kriminelë lufte. Pavarësisht kësaj, ai siguroi një mandat në Bundestag gjatë zgjedhjeve të parakohshme në shkurt.

Çështja e Krah ka marrë vëmendje të shtuar edhe për shkak të lidhjeve të tij me një ish-asistent, Jian Guo, i arrestuar vitin e kaluar nën akuzën për spiunazh për Kinën. Guo dyshohet se ka dërguar informacione të ndjeshme nga Parlamenti Evropian për më shumë se katër vjet, deri në arrestimin e tij në prill 2024.

Kryetarët e AfD-së, Alice Weidel dhe Tino Chrupalla, e cilësuan bastisjen ndaj Krah si një “çështje serioze” dhe kërkuan që hetimi të përmbyllet sa më shpejt me transparencë.

Autoritetet gjermane ende nuk kanë dhënë detaje mbi rezultatet e bastisjeve.