Presidenti amerikan, Donald Trump, ka deklaruar përmes një postimi se ka pasur një ditë shumë të suksesshme në Alaskë, ku ka zhvilluar bisedime të rëndësishme lidhur me përfundimin e luftës në Ukrainë.

Në mesazhin e bërë publik në rrjetin ‘Truth’, presidenti Trump shkruan se, takimi me Presidentin rus Vladimir Putin ka shkuar shumë mirë, ashtu si edhe një telefonatë e vonshme me Presidentin ukrainas Volodymyr Zelenskyy dhe me disa liderë europianë, përfshirë edhe Sekretarin e Përgjithshëm të NATO-s, të cilin ai e quajti ‘shumë të respektuar’.

Gjatë bisedimeve, është arritur në një konkluzion të përbashkët: mënyra më e mirë për t’i dhënë fund luftës shkatërruese mes Rusisë dhe Ukrainës është arritja e një Marrëveshjeje Paqeje dhe jo thjesht një Armëpushim, i cili shpesh nuk zgjat dhe nuk garanton stabilitet.

Trump bëri të ditur se Presidenti Zelenskyy do të vizitojë Uashingtonin të hënën në orët e pasdites, ku do të zhvillojë një takim në Zyrën Ovale. Nëse gjithçka shkon sipas planit, më pas pritet të organizohet një takim edhe me Presidentin Putin.

‘Potencialisht, mund të shpëtohen miliona jetë njerëzish,’ thekson Trump në fund të deklaratës së tij.

Mesazhi i plotë i presidentit Trump:

Një ditë e shkëlqyer dhe shumë e suksesshme në Alaska! Takimi me Presidentin Vladimir Putin të Rusisë shkoi shumë mirë, ashtu si edhe një telefonatë e vonshme me Presidentin Zelenskyy të Ukrainës dhe disa liderë europianë, përfshirë edhe Sekretarin e Përgjithshëm shumë të respektuar të NATO-s. T

ë gjithë ranë dakord se mënyra më e mirë për t’i dhënë fund luftës së tmerrshme midis Rusisë dhe Ukrainës është arritja e një Marrëveshjeje Paqeje që do ta përfundonte plotësisht luftën, dhe jo një marrëveshje të thjeshtë për armëpushim, të cilat shpesh nuk qëndrojnë gjatë.

Presidenti Zelenskyy do të vijë në Uashington, në Zyrën Ovale, të hënën pasdite. Nëse gjithçka shkon mirë, atëherë do të planifikojmë një takim edhe me Presidentin Putin. Potencialisht, miliona jetë njerëzish mund të shpëtohen. Faleminderit për vëmendjen ndaj kësaj çështjeje!