Dy senatorë republikanë në SHBA kanë kërkuar nisjen e një hetimi kongresional ndaj kompanisë Meta Platforms, pasi Reuters raportoi mbi një dokument të brendshëm të politikave që lejonte chatbot-et e saj të “angazhonin një fëmijë në biseda romantike ose sensuale”.

Meta konfirmoi autenticitetin e dokumentit, por tha se e ndryshoi atë vetëm pasi mori pyetje nga Reuters në fillim të këtij muaji, duke hequr pjesët që lejonin flirtimin ose lojërat romantike me të mitur.

Senatori Josh Hawley e akuzoi kompaninë se veproi vetëm “pasi u kap në flagrancë” dhe e cilësoi çështjen si arsye për një hetim të menjëhershëm. Senatorja Marsha Blackburn, e cila mbështet gjithashtu hetimin, tha se rasti tregon nevojën për miratimin e reformave për mbrojtjen e fëmijëve në internet, si Akti për Sigurinë Online të Fëmijëve (KOSA), i cili kaloi në Senat vitin e kaluar, por dështoi në Dhomën e Përfaqësuesve.

Dokumenti i brendshëm i Meta-s, sipas Reuters, përfshinte shembuj provokues të ndërveprimeve të lejuara nga chatbot-et, përfshirë një rast ku një robot i thoshte një tetëvjeçari pa bluzë se “çdo pëllëmbë e jotja është një kryevepër – një thesar që e çmoj shumë”. Senatorë demokratë si Ron Wyden dhe Peter Welch e cilësuan politikën “thellësisht shqetësuese” dhe kërkuan që Meta dhe CEO Mark Zuckerberg të mbahen plotësisht përgjegjës për dëmet e mundshme.

Në mungesë të legjislacionit federal për inteligjencën artificiale, disa shtete amerikane kanë miratuar rregulla të posaçme, duke përfshirë ndalimin e përdorimit të teknologjisë për krijimin e materialeve të abuzimit seksual me fëmijë.