Macron-ët punësuan hetues për të hulumtuar mbi influencuesen amerikane Candace Owens

Avokatët e Emmanuel dhe Brigitte Macron-it punësuan hetues për të hulumtuar mbi podkasteren amerikane Candace Owens ndërsa përgatiteshin ta padisnin, duke mbledhur detaje që përfshinin lidhjet e saj me personalitete të ekstremit të djathtë në Francë dhe popullaritetin e saj në mediat shtetërore ruse.

Macron-ët po e padisin Owens-in, një influencuese të njohur të krahut të djathtë në SHBA, për atë që ata e përshkruajnë si "trillime të çuditshme, shpifëse dhe ekstreme" në një seri podkasti që ka tërhequr miliona dëgjues. Pretendimi kryesor i saj është se Brigitte Macron ka lindur mashkull.

Hetimi, i realizuar nga kompania amerikane Nardello & Co, u përgatit para se presidenti francez dhe zonja e parë të ngrinin padinë kundër Owens-it muajin e kaluar.

Disa detaje nga hetimi u ndanë me Financial Times. Përveç përshkrimit të lidhjeve të saj me të djathtën ekstreme në Francë, hetuesit theksuan edhe lidhjet e Owens-it me figura populiste të krahut të djathtë në SHBA dhe Britani, si dhe ndërveprimet e saj në internet me një nacionalist rus.

"Macron-ët e kanë ngritur këtë padi duke qenë plotësisht të vetëdijshëm me kë është e rreshtuar Owens-i," tha Dan Nardello, kryetar ekzekutiv i Nardello & Co dhe ish-prokuror federal në New York.

Vendimi për të punësuar hetues tregon seriozitetin me të cilin presidenti francez dhe zonja e parë po e trajtojnë këtë padi dhe burimet që janë të gatshëm të shpenzojnë për çështjen, një shembull i rrallë i një lideri në detyrë që padit një influencuese online për përmbajtjen.

Sipas avokatit të tyre Tom Clare, bashkëthemelues i firmës së specializuar në çështje shpifjeje Clare Locke, vendimi për të paditur u shty edhe nga dëshira e Macron-ëve për të kuptuar pse një podkastere konservatore amerikane ishte interesuar për ta. Ai tha se hulumtimi mund të ndihmojë gjithashtu për t'i shpjeguar jurisë kontekstin në të cilin Owens bëri pretendimet.

Owens ka thënë: "Brigitte Macron është kapur përsëri dhe, mes avokatëve, ekipeve ndërkombëtare të PR-it dhe hetuesve, çifti po shpenzon goxha para për të qetësuar paranojën e së kaluarës së saj."

"Sa para u shpenzuan për të zbuluar se nga gjithsej 12,704 postime në Twitter, dy herë kam shpërndarë postimet e një filozofi rus? Ose se nga qindra evente ku kam folur në mbarë botën, një herë kam marrë pjesë në një konferencë në Paris me Marion Maréchal-in?"

Avokatët shpesh angazhojnë hetime mbi personat që synojnë të padisin, si pjesë e përgatitjeve për gjyq. Mandati i hetuesve ishte të dokumentonin deklaratat publike të Owens-it dhe të detajonin sfondin dhe profilin e saj, bazuar në informacion publik.

Ata përshkruan kalimin e Owens-it nga identifikimi si liberale në fillimet e karrierës, në një konservatore pas asaj që ajo e quajti ngacmim online. Ajo u bë një mbështetëse e zëshme e Donald Trump-it, por së fundmi u shkëput prej tij duke thënë se ishte "e turpëruar" që kishte bërë fushatë për të.

Hetuesit shqyrtuan origjinën e pretendimit se Brigitte Macron ka lindur mashkull. Ata zbuluan se, megjithëse një bloger spanjoll e publikoi këtë në maj 2017, ideja fitoi terren në Francë nga viti 2021. Në fund të vitit 2023, Xavier Poussard, ish-kryeredaktor i një botimi francez të ekstremit të djathtë të quajtur Faits et Documents, ndihmoi në përhapjen e pretendimeve.

Poussard tha në një video online në prill 2024 se kishte përkthyer në anglisht punimin e tij për Brigitte Macron dhe ia kishte dërguar Owens-it dhe "trumpistëve të tjerë" që nuk i përmendi me emër. Informacioni që ai ndau përfshinte përfundimet e hetimit të tij dhe disa artikuj nga media të tjera, si një shkrim i Daily Mail që trajtonte pretendimet.

"Mendoj se ajo [Owens-i] nuk dinte asgjë për Brigitte Macron-it një muaj më parë, dhe papritmas merr përsipër çështjen, duke thënë se po rrezikon karrierën për ta zbuluar këtë," tha ai, duke shtuar se kjo kishte qenë "një shtysë e madhe nga rrethi i Trump-it".

Më pas Poussard shkroi një libër të titulluar Becoming Brigitte, titull që Owens-i do ta përdorte për podkastin e saj mbi Macron-ët.

Përmendja e parë e teorisë nga Owens ishte në një episod të marsit 2024, ku ajo citonte një raport të Daily Mail të vitit 2021 me titull "Dëshmia që zonja e parë e Francës NUK ka lindur mashkull", sipas hetimit. Ajo zhvilloi gjithashtu një intervistë të gjatë me Poussard-in në podkastin e saj, duke e paraqitur atë si një zbulues të së vërtetës që Macron-ët po përpiqeshin ta heshtnin.

Hetuesit zbuluan se, pasi doli seria Becoming Brigitte e Owens-it, mediat shtetërore ruse raportuan për të. U mbulua nga Tsargrad, një kanal televiziv i drejtuar nga Konstantin Malofeev, të cilin studiuesit e përshkruan si aleat të presidentit rus Vladimir Putin. Ata zbuluan gjithashtu se Rusia RT kishte postuar për Owens-in mbi 30 herë që nga viti 2018.

Nuk u gjetën prova që Owens-i të kishte takuar zyrtarë rusë ose personalitete të mediave shtetërore ruse, apo lidhje të drejtpërdrejta personale ose biznesi me Rusinë. Por Owens-i kishte ndërvepruar në rrjete sociale me Alexander Duginin, një nacionalist dhe filozof rus, me të cilin kishin ripostuar postimet e njëri-tjetrit disa herë.

Hetuesit zbuluan gjithashtu lidhjet e Owens-it me politikanen franceze të ekstremit të djathtë Marion Maréchal, mbesën e udhëheqëses së të djathtës ekstreme Marine Le Pen. Maréchal nuk është më pjesë e partisë Rassemblement National të Le Penit, pasi iu bashkua një partie rivale me qëndrime më të ashpra ndaj emigracionit dhe çështjeve sociale.

Owens ishte folësja kryesore në konferencën Convention de la Droite në Paris më 2019, e organizuar nga grupe të ekstremit të djathtë dhe nacionaliste pranë Maréchal-it, e cila gjithashtu foli në aktivitet. Owens dhe Maréchal kanë postuar gjithashtu për njëra-tjetrën në rrjetin social X.

Hetimi po ashtu theksoi kritikat online të Owens-it ndaj presidentit ukrainas Volodymyr Zelenskyy, përfshirë ta quante atë "parazit sociopatik vrasës" dhe "drogaxhiu i lagjes".

U zbulua gjithashtu se Nigel Farage, lideri i Reform UK, kishte qenë i ftuar nderi në dasmën e Owens-it me George Farmerin, ish-drejtorin e platformës së rrjeteve sociale Parler. Hetimi theksoi gjithashtu lidhjet e saj me Tucker Carlson-in, i cili e ka intervistuar online, si dhe postimet e saj për vëllezërit Andrew dhe Tristan Tate.

Padia e Macron-ëve, e ngritur në Delaware, akuzon Owens-in për publikimin e "gënjeshtrave", përfshirë se Brigitte ka lindur mashkull me emrin Jean-Michel Trogneux. Avokati Clare i tha FT muajin e kaluar se presidenti dhe zonja e parë e Francës janë të gatshëm të udhëtojnë në Delaware për t'u paraqitur personalisht në gjyq. / Financial Times - Syri.net