Informatori demokrat i tha FBI-së se Adam Schiff miratoi rrjedhjen e informacionit të klasifikuar për të goditur Trump-in

Një informator demokrat i ka thënë FBI-së se Adam Schiff kishte miratuar rrjedhjen e informacionit të klasifikuar me qëllim diskreditimin e presidentit Donald Trump, sipas disa dokumenteve të sapo publikuara.

Dokumentet, që u siguruan nga Just The News, iu dorëzuan kohët e fundit Kongresit nga drejtori i FBI-së, Kash Patel.

Informatori, i cili raportohet se kishte punuar për mbi dhjetë vjet për demokratët në Komitetin e Inteligjencës së Dhomës së Përfaqësuesve, e raportoi sjelljen e pretenduar të Schiff-it te FBI-ja në vitin 2017.

Sipas raportit, ky punonjës i inteligjencës e quajti nxjerrjen e informacionit “tradhti” dhe “të paligjshme”, si edhe joetike. Ai u mor sërish në pyetje nga FBI-ja në vitin 2023.

Punonjësi tha edhe se kishte marrë pjesë personalisht në një takim ku Schiff dha miratimin për nxjerrjen e të dhënave.

“Gjatë punës në këtë rol, [emri i punonjësit i fshirë në dokumente] u thirr në një takim të stafit nga SCHIFF,” thuhet në dokumente, sipas Just The News.

“Në këtë takim, SCHIFF deklaroi se grupi do të nxirrte informacion të klasifikuar, i cili ishte diskreditues për presidentin e Shteteve të Bashkuara, DONALD J. TRUMP. SCHIFF tha se informacioni do të përdorej për të ngritur aktakuzë ndaj presidentit TRUMP.”

“[Informatori] tha se kjo do të ishte e paligjshme dhe, pasi shprehu shqetësimin e tij, anëtarë të paidentifikuar të takimit e siguruan se nuk do të kapeshin duke nxjerrë informacion të klasifikuar,” shton raporti.

John Solomon, bashkautor i artikullit me Jerry Dunleavy të Just The News, u shfaq në programin “Hannity” në Fox News Channel për të diskutuar për raportin.

“Ky është i pari nga disa hetime të mëdha për rrjedhje informacioni që do të shohim gjatë ditëve të ardhshme,” tha Solomon. “Do të shihni persona të tjerë me peshë që u identifikuan qartë nga FBI-ja si nxjerrës të sekreteve të klasifikuara.”

“Ata u kallëzuan nga vetë stafi i tyre kur u morën në pyetje nga FBI-ja. E përsëris, nuk ndodhi asgjë,” shtoi ai. “Është një model i përsëritur. Pyetja tani shtrohet: A do të ndryshojë kjo dinamikë në Departamentin e Drejtësisë në administratën Trump?”

Menjëherë pas publikimit të raportit, Patel e ndau në X, duke thënë se FBI-ja “e gjeti dhe e deklasifikoi”.

“Tani Kongresi e kupton se si informacioni i klasifikuar u nxor për të formësuar narrativat politike dhe do të vendosë nëse institucionet tona u përdorën si armë kundër popullit amerikan,” shkroi Patel. / Fox News - Syri.net