Indi/ Shirat e rrëmbyeshëm shkaktojnë përmbytje në Uttarakhand, 4 viktima dhe 50 të zhdukur

Zyrtarët indianë thanë të martën se një breshëri reshjesh shkaktoi përmbytje të menjëhershme në shtetin verior të Uttarakhand, duke rrënuar një fshat në Himalaje.

Të paktën katër persona u vranë, sipas një zyrtari lokal. Mediat raportojnë se më shumë se 50 persona dyshohet se janë të zhdukur.  Prashant Arya, një zyrtar administrativ, tha se rreth një duzinë hotelesh u përmbytën dhe disa dyqane u shembën.

Pamjet në mediat sociale treguan një rrjedhë uji që duket se fshinte shtëpitë poshtë një kodre drejt fshatit. Policia u bëri thirrje njerëzve të qëndrojnë larg lumenjve.  Kryeministri i shtetit të Uttarakhand, Pushkar Singh Dhami, tha se ekipet e shpëtimit ishin vendosur “në gatishmëri lufte”.

“Po bëjmë gjithçka që është e mundur për të shpëtuar jetë dhe për të ofruar ndihmë”, tha ai në një deklaratë.

Autoriteti Kombëtar i Menaxhimit të Fatkeqësive tha se kërkoi helikopterë nga qeveria federale për të ndihmuar, ndërsa ekipet e shpëtimit kishin vështirësi të hynin në terrenin e largët.

Rajoni i Himalajeve është i prirur ndaj përmbytjeve të menjëhershme dhe rrëshqitjeve të dheut gjatë sezonit të musoneve, me breshëri reshjesh që i bëjnë këto fenomene më intensive.

Në vitin 2021, më shumë se 200 njerëz u vranë në Uttarakhand ndërsa përmbytjet e menjëhershme shkatërruan dy projekte hidroelektrike .  Në Himalajet Indiane ka rreth 10,000 akullnaja, shumë prej të cilave po tërhiqen për shkak të ndryshimeve klimatike .