Holanda bëhet vendi i parë i NATO-s që furnizon Ukrainën me armë amerikane përmes iniciativës së re të aleancës

Amsterdami ka hyrë në histori si vendi i parë i NATO-s që aktivizon mekanizmin e ri të aleancës për të furnizuar Ukrainën me armë amerikane. Qeveria holandeze njoftoi se do të kontribuojë me 500 milionë euro për të blerë pajisje ushtarake amerikane, përfshirë komponentë dhe raketa për sistemet mbrojtëse Patriot, që do të dërgohen në vijën e frontit ukrainas.

Ky veprim vjen si përgjigje ndaj nismës së re të shpallur nga Presidenti amerikan Donald Trump pas rizgjedhjes së tij, sipas së cilës SHBA-të do të furnizojnë me armë, por pagesa do të bëhet nga aleatët evropianë.

Ministri holandez i Mbrojtjes, Ruben Brekelmans, dhe Sekretari i Përgjithshëm i NATO-s, Mark Rutte, përshëndetën këtë hap si një veprim të guximshëm dhe të domosdoshëm për të mbrojtur Ukrainën dhe Evropën nga agresioni rus. Ambasadori amerikan në NATO, Matt Whitaker, e cilësoi paketën si “një përmbushje të drejtpërdrejtë të iniciativës së Trump” dhe u shpreh optimist për mbështetje të mëtejshme nga aleatët.

Presidenti ukrainas, Volodymyr Zelenskyy, falënderoi Holandën për udhëheqjen dhe kontributin vendimtar në përmirësimin e mbrojtjes ajrore të vendit të tij, duke theksuar se “kjo paketë do të ndihmojë realisht në shpëtimin e jetës së njerëzve”.