'Ai është një skelet njeriu' – Vëllai i pengut izraelit trondit botën me rrëfimin

Vëllai i një pengu izraelit të mbajtur në Rripin e Gazës i ka thënë BBC-së se një video e publikuar nga Hamasi, që e tregon atë të dobësuar dhe të rraskapitur, është “një formë e re mizorie” që ka shkatërruar prindërit e tij.

Hamasi publikoi pamjet e Evyatar David, 24 vjeç, të shtunën, duke nxitur dënime të forta nga Izraeli dhe liderët perëndimorë.

“Ai është një skelet njeriu. Po e lënë të vdesë nga uria deri në pikën që mund të vdesë nga momenti në moment, dhe po vuan tmerrësisht. Me vështirësi flet, me vështirësi lëviz,” tha Ilay David, vëllai i tij, në një intervistë të hënën.

Në video, Evyatar dëgjohet duke thënë: “S’kam ngrënë për ditë të tëra... Me vështirësi kam pasur ujë për të pirë.” Ai shfaqet duke gërmuar një varr, për të cilin thotë se është i tij.

Familjet e pengjeve i kanë bërë thirrje kryeministrit Benjamin Netanyahu që të vendosë përparësi lirimin e tyre, në një kohë kur raportohet se ai mund të jetë duke planifikuar zgjerimin e fushatës ushtarake në Gaza.

Pamjet e Evyatar-it u publikuan pak pasi Xhihadi Islamik Palestinez publikoi një video tjetër ku shihej një peng tjetër, Rom Braslavski, i dobësuar dhe duke qarë.

Të dy burrat u rrëmbyen gjatë festivalit muzikor Nova, gjatë sulmit të udhëhequr nga Hamasi në jug të Izraelit më 7 tetor 2023. Ata janë mes 50 pengjeve që ende mbahen në Gaza, nga të cilët besohet se rreth 20 janë gjallë.

Ilay David tha se babai i tij mezi e kishte njohur zërin e Evyatarit në video dhe nuk kishte mundur të flinte. Nëna e tyre, tha ai, kishte qarë gjatë gjithë ditës.

“Duke parë ato pamje të vëllait tim si skelet, e kuptuam se kjo është një formë e re mizorie,” tha z. David. “Është më e ulëta që mund të arrihet.”

Ai u bëri thirrje liderëve botërorë të bashkohen për të shpëtuar vëllanë e tij dhe pengjet e tjera “nga duart mizore dhe të shtrembëruara të Hamasit.”

“Duhet të përqendrohemi tek mesazhi: Evyatari po vdes. Duhet t’i japim ilaçe, ushqim të duhur, dhe këtë trajtim duhet ta marrë tani përndryshe do të vdesë.”

Krahu i armatosur i Hamasit ka mohuar se qëllimisht i urit pengjet, duke thënë se ata hanë të njëjtën ushqim si luftëtarët dhe populli në Gaza.

Pas publikimit të videove, Netanyahu foli me familjet e pengjeve dhe i siguroi ata se përpjekjet për kthimin e tyre “do të vazhdojnë pandërprerë dhe pa pushim”.

Por një zyrtar izraelit i cituar gjerësisht nga mediat vendase tha se Netanyahu po përpiqet t’i lirojë pengjet përmes “mposhtjes ushtarake të Hamasit”.

Mundësia e një përshkallëzimi të ri në Gaza mund të shtojë tensionet me aleatët e Izraelit, të cilët kanë bërë thirrje për një armëpushim të menjëhershëm, ndërsa raportet për palestinezë që po vdesin nga uria kanë shkaktuar tronditje globale.

Grupi kryesor që përfaqëson familjet e pengjeve e dënoi idenë e një ofensive të re ushtarake, duke deklaruar: “Netanyahu po e çon Izraelin dhe pengjet drejt katastrofës.”

Ky qëndrim u shpreh qartë edhe në një letër të nënshkruar nga rreth 600 zyrtarë të sigurisë izraelite në pension, drejtuar presidentit amerikan Donald Trump, me kërkesën që të ushtrojë presion mbi Izraelin për të ndaluar menjëherë luftën në Gaza.

“Besueshmëria juaj me shumicën e izraelitëve rrit aftësinë tuaj për të ndikuar në drejtimin e duhur tek kryeministri Netanyahu dhe qeveria e tij: ndalni luftën, ktheni pengjet, ndaloni vuajtjet,” shkruhet në letër.

Grupi përfshin emra të njohur si ish-shefi i Mossad-it Tamir Pardo, Ami Ayalon ish-drejtori i Shin Bet (shërbimi sekret i brendshëm i Izraelit), ish-kryeministri Ehud Barak dhe ish-ministri i Mbrojtjes Moshe Yaalon.

“Sipas gjykimit tonë profesional, Hamasi nuk përbën më një kërcënim strategjik për Izraelin,” thanë ata.

“Në fillim kjo luftë ishte e drejtë, një luftë mbrojtëse, por pasi u arritën objektivat ushtarakë, kjo luftë pushoi së qeni e drejtë,” tha Ayalon.

Këta ish-drejtues janë pjesë e grupit "Komandantët për Sigurinë e Izraelit" (CIS), që më parë i kanë bërë thirrje qeverisë të fokusohet tek kthimi i pengjeve.

“Ndaloni luftën në Gaza! Në emër të CIS, grupi më i madh izraelit i gjeneralëve në pension nga IDF, Mossad, Shin Bet, policia dhe diplomacia, ju bëjmë thirrje ta përfundoni luftën në Gaza. Ashtu si në Liban tani është koha për ta bërë edhe në Gaza,” thuhet në letër drejtuar presidentit amerikan.

Izraeli nisi një luftë shkatërrimtare në Gaza pas sulmit të Hamasit më 7 tetor, ku u vranë rreth 1,200 persona dhe 251 u morën peng.

Më shumë se 60,000 persona janë vrarë në Gaza që nga ajo kohë, sipas Ministrisë së Shëndetësisë të drejtuar nga Hamasi.

Të hënën, ministria raportoi se të paktën 94 persona u vranë në Gaza në 24 orët e fundit, përfshirë dhjetëra që u vranë nga sulmet ajrore izraelite.

Territori po përballet gjithashtu me mungesë ekstreme të ushqimeve dhe ndihmave për shkak të kufizimeve të ashpra të vendosura nga Izraeli për hyrjet në Gaza. Ministria deklaron se 180 persona përfshirë 93 fëmijë kanë vdekur nga kequshqyerja që nga fillimi i luftës.

Raporte të tilla janë bërë pothuajse të përditshme muajt e fundit, por janë të vështira për t’u verifikuar, pasi gazetarët ndërkombëtarë, përfshirë edhe BBC-në, janë të ndaluar të hyjnë në Gaza nga Izraeli.

Agjencitë e mbështetura nga OKB-ja kanë deklaruar se “skenari më i keq i urisë është duke ndodhur aktualisht” në Gaza./BBC