S’ndalet Gjermania, 770 milionë euro për më shumë se 1,000 automjete logjistike për ushtrinë

Marrëveshja për më shumë se 1,000 automjete logjistike vjen në një kohë kur Evropa po rrit shpenzimet ushtarake në përgjigje të tensioneve globale.

Forcat e armatosura të Gjermanisë, Bundeswehr, i kanë bërë një porosi Rheinmetall për rreth 1,400 automjete logjistike ushtarake, me vlerë 770 milionë euro.

Firma e mbrojtjes me seli në Dyseldorf tha në një deklaratë të hënën se marrëveshja përfshin 963 automjete me sisteme karrocerie të ndërrueshme, të cilat kanë kontejnerë të ndërrueshëm. Ajo gjithashtu përfshin 425 automjete transporti të pambrojtura (UTV), të cilat janë kamionë jo të blinduar që përdoren në zona me rrezik të ulët.

Rreth orës 16:00 CEST, aksionet e Rheinmetall u rritën me rreth 3% pas lajmit.

“Si një partner i besueshëm i Bundeswehr-it, jemi të kënaqur që po dorëzojmë automjete shtesë dhe kështu po kontribuojmë në lëvizshmërinë dhe gatishmërinë operacionale të forcave të armatosura”, tha André Barthel, kryetar i bordit të automjeteve ushtarake Rheinmetall MAN, një sipërmarrje e përbashkët midis MAN Truck & Bus dhe Rheinmetall.

Porositë janë rezervuar për tremujorin e tretë, ndërsa dërgesat do të bëhen para fundit të vitit 2025.

Rheinmetall ka qenë një nga përfituesit kryesorë të biznesit nga shpenzimet e mëdha të Evropës në mbrojtje, me aksionet e saj që janë rritur më shumë se 190% nga fillimi i vitit.

Lufta e Rusisë në Ukrainë kishte rritur tashmë kërkesën për produktet e Rheinmetall dhe tani investitorët shpresojnë të përfitojnë nga shpenzimet më të mëdha publike për pajisjet ushtarake.

Presioni nga Presidenti i SHBA-së, Donald Trump, e ka inkurajuar dukshëm Evropën të rrisë aftësitë e saj mbrojtëse, dhe Gjermania ka rënë dakord të ndryshojë rregullat e saj të rrepta të borxhit për të lehtësuar investimet. 

Bundeswehr-i aktualisht po kalon një proces të madh për të përditësuar teknologjinë e tij, dhe Gjermania është zotuar të rrisë shpenzimet e mbrojtjes së vendit të saj në 3.5% të produktit të brendshëm bruto në vitin 2029.

Këtë vit, aleanca e NATO-s ra dakord gjithashtu të rrisë shpenzimet e mbrojtjes nga 2% në 5% të PBB-së deri në vitin 2035./ Euronews.