Si është përfshirë George Sorosi në skemën Russiagate: Shtojca e Durhamit

Shtojca e sapodeklasifikuar e raportit përfundimtar të ish-prokurorit special John Durham nga viti 2023 lidh George Sorosin me skemën Russiagate, duke vendosur një organizatë të rëndësishme grantdhënëse të donatorit kryesor demokrat në fillimin e hetimit të FBI-së.

Sipas dokumentit 29-faqësh të deklasifikuar të enjten, infomacionet e mbledhura nga aktorë të huaj tregonin se një bashkëpunëtor i Sorosit e dinte që FBI-ja do të luante rol në shtytjen e narrativës së bashkëpunimit me Rusinë, para se Byroja të niste zyrtarisht hetimin për lidhjet mes Trump-it e Rusisë, me emrin e koduar Crossfire Hurricane, me 31 korrik 2016.

Shtojca shpjegon se operativë të inteligjencës ruse kishin hakuar dhe marrë akses në email-et e disa organizatave jofitimprurëse amerikane, përfshirë Fondacionet Shoqëria e Hapur (OSF), organi kryesor i dhënies së granteve nga rrjeti Soros, i financuar kryesisht nga miliarderi.

“Dy nga email-et e dukshëm të hakuara duket se kanë origjinë nga Fondacionet Shoqëria e Hapur,” thuhet në shtojcë.

Leonard Benardo, nënkryetar i lartë i OSF-së në atë kohë dhe drejtor rajonal për Euroazinë (duke mbikëqyrur punën që lidhej me Rusinë dhe republikat ish-sovjetike), ishte, sipas shtojcës, autori i mundshëm i këtyre email-eve.

Në një nga email-et e supozuara të Bernardos, datë 25 korrik 2016, ai thuhet se parashikonte që FBI do të ndihmonte planin e fushatës së Hillary Clinton-it për ta lidhur Donald Trump-in me Rusinë.

“Analiza mediatike mbi hakimin e Komitetit Kombëtar Demokrat duket e besueshme… Julie [këshilltare e fushatës së Clinton-it] thotë se do të jetë një fushatë afatgjatë për të demonizuar [presidentin rus Vladimir] Putin dhe Trump. Tani është e dobishme për një ngritje pas konventës,” thuhet se ka shkruar Benardo. “Më vonë, FBI do t'i hedhë më shumë benzinë zjarrit.”

Në email-in tjetër, më 27 korrik 2016, Benardo thuhet se shkruante: “HRC [Hillary Rodham Clinton] miratoi idenë e Julie-t për Trump-in dhe hakerët rusë që pengojnë zgjedhjet amerikane.”

“Kjo duhet t’ua shpërqendrojë mendjen njerëzve nga email-et e saj të humbura, veçanërisht nëse kjo çështje arrin nivelin olimpik,” thuhet se vazhdonte Benardo. “Qëllimi është ta bëjmë Rusinë çështje të brendshme amerikane. Thuaj diçka si ‘kërcënim ndaj infrastrukturës kritike’ që zgjedhjet të duken të çrregullta, pasi si POTUS ashtu edhe VPOTUS e kanë pranuar këtë fakt, komuniteti i inteligjencës do të përshpejtojë kërkimin për prova që fatkeqësisht ende mungojnë.”

Pas shqyrtimit të komunikimeve të tjera që përfshinin këshilltaren e politikës së jashtme të Clinton-it, Julianne “Julie” Smith, ekipi i Durhamit arriti në përfundimin se fushata e Clinton-it “mund të ketë dashur ose pritur që FBI-ja ose agjenci të tjera ta ndihmonin përpjekjen (‘të hidhnin më shumë vaj në zjarr’) duke nisur një hetim zyrtar mbi hakimin e DNC-së.” Kjo ndodhi realisht, dhe hetimi i mëvonshëm nga një prokuror i posaçëm zgjati për vite dhe dominoi pjesën më të madhe të mandatit të parë të Trump-it.

“Sipas vlerësimit më të mirë të Zyrës,” thuhet në shtojcën e Durham-it, “email-et e 25 dhe 27 korrikut, që pretendohet se janë nga Benardo, ishin në fund të fundit një përzierje e disa email-eve të marra përmes hakimeve ruse në institutet amerikane të mendimit, përfshirë Fondacionet Shoqëria e Hapur, Carnegie Endowment dhe të tjera.”

Në një deklaratë pas deklasifikimit të shtojcës, Fondacioni Shoqëria e Hapur hodhi poshtë akuzat që e implikonin atë në këtë çështje.

“Pretendimi se Fondacioni Shoqëria e Hapur ndihmoi në orkestrimin e një hetimi të FBI-së është një gënjeshtër e turpshme,” tha një zëdhënës i OSF për Fox News. “Ajo bazohet në dizinformim dashakeq që gjurmohet deri te inteligjenca ruse dhe tani po përdoret si pjesë e një fushate politike për të sulmuar drejtuesit tanë dhe punën tonë për të promovuar të drejtat e njeriut.”

Përfaqësuesi i OSF-së shtoi: “Raporti Durham nuk gjeti asnjë shkelje nga stafi ynë. Ne jemi një organizatë jopartiake dhe nuk merremi me veprimtari fushatash politike. Këto akuza nuk janë thjesht të pamatura, por të rrezikshme. Ato janë pjesë e një përpjekjeje më të gjerë për të nxitur armiqësi dhe për të minuar shoqërinë civile dhe synojnë të shpërqendrojnë vëmendjen nga skandalet e vërteta.”

Sipas shtojcës së Durhamit, kur Benardo u konfrontua nga hetuesit me email-et në fjalë, ai tha se “nuk i dukeshin të njohura” dhe se nuk do të kishte përdorur terma si “benzinë zjarrit.”

“Benardo gjithashtu tha se nuk dinte kush ishte ‘Julie’, siç përmendej në email,” shkruhet në shtojcë. “Benardo deklaroi se, me sa i kujtohet, nuk i kishte hartuar ai këto email-e.”

Ekipi i Durhamit intervistoi agjentët e FBI-së të përfshirë në operacionin Crossfire Hurricane për të vlerësuar besueshmërinë e informacionit. Bazuar në vlerësimin e tyre, analistët dhe oficerët e inteligjencës besonin se email-et e Benardos ishin “ndoshta autentike.” Por FBI-ja në fund e shpërfilli informacionin që sugjeronte se Clinton-i ishte pas narrativës së bashkëpunimit me Rusinë dhe vijoi me hetimin agresiv të Trump-it gjatë dhe pas zgjedhjeve të 2016-s.

Shtojca gjithashtu përmendte memo që përshkruanin “biseda konfidenciale” mes kryetares së atëhershme të Komitetit Kombëtar Demokrat, Debbie Wasserman Schultz, dhe dy zyrtarëve të lartë të OSF-së: Leonard Benardo dhe Jeffrey Goldstein, këshilltar i lartë për politikën në Euroazi në OSF deri në gusht 2016. / Washington Examiner - Syri.net