Koreja e Jugut heq altoparlantët e propagandës kufitare në shenjë pajtimi me Veriun

Koreja e Jugut ka nisur çmontimin e altoparlantëve të fuqishëm të propagandës përgjatë kufirit me Korenë e Veriut, në një përpjekje për të ulur tensionet dhe për të krijuar hapësirë për dialog mes dy vendeve. Ushtria jugkoreane konfirmoi veprimin si një masë praktike për lehtësimin e përplasjes me fqinjët veriorë, pa ndikuar në gatishmërinë ushtarake të vendit.

Altoparlantët ishin ndezur nga qeveria konservatore në qershor 2024, në hakmarrje ndaj Koresë së Veriut që kishte lëshuar balona të mbushura me mbeturina përtej kufirit. Përmes tyre transmetoheshin çdo ditë mesazhe kundër regjimit të Phenianit dhe muzikë pop koreane (K-pop), gjë që zemëroi qeverinë e Kim Jong Un, e cila prej kohësh përpiqet të ndalojë depërtimin e kulturës së Jugut në vendin e saj.

Vendimi për t’i çmontuar altoparlantët vjen pas fitores së presidentit të ri liberal Lee Jae Myung, i cili zëvendësoi konservatorin Yoon Suk Yeol pas zgjedhjeve të parakohshme në qershor. Lee është zotuar të përmirësojë marrëdhëniet me Korenë e Veriut dhe të rindërtojë besimin mes palëve, pas një periudhe të gjatë ftohjeje diplomatike.

Ministria jugkoreane nuk dha detaje specifike mbi procesin e heqjes dhe as nëse altoparlantët do të mund të riinstalohen në të ardhmen në rast përshkallëzimi të situatës. Sipas zëdhënësit Lee Kyung-ho, nuk ka pasur asnjë komunikim paraprak me Phenianin para kësaj mase.

Ndërkohë, Koreja e Veriut ende nuk ka komentuar publikisht mbi këtë zhvillim, ndërsa tensionet në Gadishullin Korean mbeten të larta për shkak të programit bërthamor të Veriut dhe stërvitjeve ushtarake të Jugut me Shtetet e Bashkuara dhe Japoninë.