Makina dhe smartfonët mund të jenë ndër eksportet më të mëdha të Koresë së Jugut drejt SHBA-së, por pak produkte ngjallin më shumë përkushtim se sa produktet kozmetike të këtij vendi aziatik.

K-beauty – një term që përfshin një gamë të gjerë të produkteve të kujdesit për lëkurën, grimit dhe kozmetikës nga Koreja e Jugut – është vlerësuar për cilësinë dhe çmimin e përballueshëm, duke nxitur kërkesën në rritje vitet e fundit.

Popullariteti global i kulturës koreane ka ndihmuar gjithashtu në rritjen e kërkesës për kozmetikën e saj.

Pearl Mak, e cila jeton në SHBA, tregon për BBC se u njoh me produktet K-beauty përmes shoqeve të saj. Serumi koreano-jugor i përshtatet më mirë lëkurës së saj krahasuar me disa marka perëndimore që mund të jenë më të ashpra, thotë 27-vjeçarja që punon si dizajnere grafike.

Tani, “95% e produkteve të mia të kujdesit për lëkurën janë K-beauty,” shton ajo.

Mak nuk është e vetmja që ka përqafuar markat koreane. Vetëm gjatë vitit 2024, amerikanët shpenzuan rreth 1.7 miliardë dollarë për produkte K-beauty – një rritje me mbi 50% krahasuar me vitin paraardhës.

Produktet K-beauty shpesh kanë çmime më tërheqëse se alternativat perëndimore dhe përmbajnë përbërës unikë, si ekstrakti i gjetheve “heartleaf” apo mukusi i kërmillit, të cilët nuk janë të zakonshëm në Perëndim.

Tarifat e reja nga SHBA

Ish-presidenti Donald Trump ka vendosur një tarifë 15% mbi importet nga Koreja e Jugut, përfshirë produktet kozmetike.

Edhe pse më e ulët se 25% që ishte paralajmëruar, shumë konsumatorë nuk po rrezikojnë.

Kompania amerikane Santé Brand, që tregton produkte K-beauty, raportoi një rritje me 30% të porosive në prill, menjëherë pas shpalljes së tarifave të reja.

“Kur dolën njoftimet për tarifat, konsumatorët filluan të bëhen strategjikë për t’u përballur me pasigurinë,” tha themeluesja e markës, Cheyenne Ware, për BBC.

Menaxherja e një tjetër shitësi K-beauty në SHBA, Senti Senti, Winnie Zhong, thotë se kanë nisur të bëjnë më shumë porosi që kur Trump kërcënoi me tarifat. Madje këtë javë, ajo mori njoftime nga furnitorët për të “bërë stok përpara se tarifat të hyjnë në fuqi”.

Çmimet do të rriten

Të dyja kompanitë e shitjes me pakicë paralajmërojnë se çmimet do të rriten, pasi tarifat do të ndikojnë mbi të gjithë industrinë.

“Kushdo që ju thotë se çmimet do të mbeten të pandryshuara për dy vitet e ardhshme, është naiv,” thotë Ware.

Sipas ekonomistit Munseob Lee nga Universiteti i Kalifornisë në San Diego, rritja e çmimeve do të jetë veçanërisht e ndjeshme për shitësit më të vegjël, të cilët punojnë me fitime të vogla në platforma si Amazon.

Megjithatë, popullariteti i kulturës koreane në nivel global do ta mbajë kërkesën për K-beauty të lartë, thotë Lee.

“Blerësit rastësorë mund të stepën nga çmimet e larta, por fansat e vërtetë nuk do të gjejnë zëvendësues të lehtë.”

Edhe Zhong është dakord. Ajo mendon se klientët do të vazhdojnë të blejnë K-beauty, por mund të blejnë më pak njësi për shkak të çmimeve më të larta.

A do të ndalet blerja për shkak të tarifave?

Për Pearl Mak, tarifat nuk janë pengesë.

“Varet se sa do të rriten çmimet, por për momentin jam e gatshme të paguaj më shumë për të blerë të njëjtat produkte,” thotë ajo.

Markat e mëdha vs. të voglat

Sipas konsulentit të biznesit Eyal Victor Mamou në Korenë e Jugut, markat e mëdha K-beauty janë në një pozicion më të mirë për të përballuar kostot shtesë, pasi kanë marzhe më të mëdha fitimi dhe më shumë fleksibilitet.

Por për firmat më të vogla, që prodhojnë gjithçka në Kore, do të jetë më e vështirë të mbajnë kostot nën kontroll. “Efekti do të ndihet pas disa muajsh, kur produktet aktuale të magazinuara të përfundojnë dhe të hyjnë në shitje produktet e prodhuara me çmime të reja.”

Tarifa edhe për Bashkimin Europian dhe Japoninë

Kohët e fundit, Trump ka arritur marrëveshje edhe me Japoninë dhe BE-në, duke vendosur të njëjtat tarifa 15% për eksportet e tyre drejt SHBA, njësoj si për Korenë e Jugut.

Kjo do të thotë se edhe vendet me marka të fuqishme kozmetike, si Franca dhe Japonia, tani do të përballen me të njëjtën barrë doganore si K-beauty.

A do ta zëvendësojnë produktet amerikane?

Në thelb të politikës tregtare të Trump është ambicia për të nxitur prodhimin brenda SHBA. Por mbetet për t’u parë nëse konsumatorët amerikanë do të kthehen drejt markave vendase.

Mak nuk është e bindur.

“Unë shpesh kërkoj alternativa të prodhuara në SHBA, por ende nuk kam gjetur ndonjë që të jetë efektive si ato koreane. Prandaj nuk do të zgjidhja produktet amerikane… ende.”/BBC