Ekipet e shpëtimit në Kili po vazhdojnë kërkimin për katër minatorë të bllokuar në një minierë që u shemb pas një tërmeti dy ditë më parë, pasi u gjet trupi i njërit prej tyre.

Kompania shtetërore Codelco tha se mbetje njerëzore janë gjetur në minierën e bakrit El Teniente, rreth 70 km në juglindje të kryeqytetit Santiago.

Firma thotë se përpjekjet e ekipeve të shpëtimit po vazhdojnë, ndërsa fati i katër punonjësve të tjerë është i paqartë.

LEXO EDHE: Shembet një minierë në Kili

Shembja e disa prej tuneleve nëntokësore të minierës u shkaktua nga një tërmet me magnitudë 4.2 të enjten. Minatorët e bllokuar në atë kohë po punonin thellë nën sipërfaqe.

Një person ishte raportuar i vrarë pas tërmetit, ndërsa katër të tjerë mbetën të bllokuar në minierë. Codelco tha se viktima e gjetur në minierë të shtunën ende duhet të identifikohet.

“Ky zbulim na mbush me trishtim, por na tregon gjithashtu se jemi në vendin e duhur, se strategjia që ndoqëm na çoi drejt tyre”, tha në një deklaratë drejtori i përgjithshëm i El Teniente Division, Andres Music.

Ekipet e shpëtimit kanë përdorur makineri të rënda në përpjekje për të pastruar kalimet e bllokuara në mënyrë që të arrijnë te minatorët. Music tha se ekipet e shpëtimit shpresonin të vazhdonin me një shpejtësi prej 15-20 metrash (49-66 këmbë) çdo 24 orë. El Teniente është miniera më e madhe nëntokësore e bakrit në botë dhe ndodhet lart në malet e Andeve në Kilin qendror.