Kopenhaga po fiton gjithnjë e më shumë reputacionin si “Las Vegasi i Evropës”, falë rritjes së ndjeshme të numrit të çifteve ndërkombëtare që zgjedhin të martohen në këtë qytet për shkak të mungesës së burokracisë. Sipas autoriteteve lokale, vetëm vitin e kaluar u zhvilluan rreth 8,000 martesa në kryeqytetin danez, më shumë se 5,000 prej të cilave për çifte që nuk janë banorë të Danimarkës.

Drejtuesja e departamentit të martesave në Bashkinë e Kopenhagës, Anita Okkels Birk Thomsen, tha se numri i dasmave është pothuajse dyfishuar krahasuar me pesë vite më parë, ndërsa çiftet vijnë nga e gjithë bota për të përfituar nga një proces i thjeshtuar dhe i shpejtë. Danimarka nuk kërkon certifikata lindjeje apo dëshmi të statusit beqar, dhe dokumentacioni për martesë përpilohet brenda pesë ditëve me një tarifë prej 282 eurosh.

Për kontrast, në vende si Franca apo Gjermania, çiftet duhet të kalojnë nëpër një labirint burokratik me dokumente, dëshmi, certifikata dhe audicione përpara se të mund të lidhin martesë zyrtare. Kjo ka bërë që shumë të huaj që jetojnë në BE të shohin Danimarkën si një alternativë të lehtë, përfshirë komunitetet LGBTQ+, duke pasur parasysh se Danimarka ishte vendi i parë në botë që njohu ligjërisht bashkëjetesat e të njëjtit seks që në vitin 1989.

Megjithatë, ky fluks ka shkaktuar pakënaqësi tek banorët vendas. Zyrtarja e Kopenhagës për kulturën dhe kohën e lirë, Mia Nyegaard, paralajmëron se kërkesa e lartë ka vështirësuar mundësinë që vetë danezët të caktojnë ceremoni martesore në qytetin e tyre. Si reagim, autoritetet planifikojnë që nga tetori të rezervojnë 40 përqind të terminëve për banorët lokalë, ndërsa po shqyrtohen edhe masa të tjera për të menaxhuar kapacitetin.

Megjithëse martesa në Danimarkë mund të përfundojë brenda pak ditësh, ekspertët paralajmërojnë se njohja e saj ligjore në vendet e tjera varet nga rregulloret kombëtare, gjë që mund të sjellë sfida pas kthimit në atdhe. Por për mijëra çifte që kërkojnë thjeshtësi dhe efikasitet, Danimarka mbetet ende altar i preferuar – edhe nëse kjo nënkupton një vend më pak romantik, por më pak stresues se Parisi.