Kush është Kermit Gosnell, mjeku i aborteve që vrau foshnjat që lindnin të gjalla

Një hetim i vitit 2010 për klinikën e dr. Kermit Gosnellit në Perëndim të Filadelfias zbuloi se ai dhe stafi i tij jo vetëm që kryenin aborte të paligjshme në fazë të vonë të shtatzënisë, por gjithashtu vrisnin foshnjat e lindura të gjalla duke u prerë palcën kurrizore me gërshërë.

Në shkurt të vitit 2010, autoritetet federale bastisën Women’s Medical Society, klinikën e dr. Kermit Gosnellit në Perëndim të Filadelfias. Ata ishin aty për të hetuar një rrjet shpërndarjeje të paligjshme të ilaçeve që Gosnell drejtonte nga zyra, por ajo që zbuluan ishte edhe më tronditëse.

Brenda shisheve të qumështit, kartonëve të lëngut të portokallit dhe kutive të ushqimit për mace ndodheshin mbetjet e dhjetëra fetuseve. Një hetim zbuloi se Gosnelli fitonte mijëra dollarë në ditë duke ofruar aborte të paligjshme në fazë të vonë për gra të dëshpëruara. Në mënyrë makabre, u zbulua gjithashtu se shumë prej këtyre foshnjave ishin vrarë pas lindjes.

Punonjësit e Gosnellit dëshmuan se kishin vrarë qindra të sapolindur me urdhrin e doktorit, duke u prerë palcën kurrizore me gërshërë pasi lindnin të gjallë. Gratë që vinin në klinikë përballeshin me kushte jashtëzakonisht të ndotura gjatë procedurave, dhe u jepeshin qetësues nga staf i pa trajnuar dhe i pakualifikuar.

Kermit Gosnelli u shpall përfundimisht fajtor për vrasjen e tri foshnjave, si dhe për vrasje të pavullnetshme të një pacienteje që kishte vdekur pasi i ishte dhënë një dozë vdekjeprurëse qetësuesish. Ai u dënua me burgim të përjetshëm pa të drejtë lirimi me kusht dhe vazhdon të jetë pas hekurave edhe sot.

Jeta e hershme e Kermit Gosnellit

Kermit Barron Gosnelli lindi më 9 shkurt 1941, në Filadelfia, Pensilvani. Ai ishte një nxënës i zgjuar që u diplomua në shkollën prestigjioze Central High School në vitin 1959 dhe më vonë ndoqi për një kohë të shkurtër Universitetin e Pensilvanisë.

Pasi u diplomua me një diplomë bachelor në Dickinson College, Gosnell studioi për mjekësi në Universitetin Thomas Jefferson. Gjatë disa dekadave në vijim, ai u përqendrua në ndihmën për emigrantë, refugjatë dhe njerëz që jetonin në varfëri, duke krijuar fillimisht një program për adoleshentë në vështirësi dhe një klinikë për rehabilitim nga droga.

Gosnelli ishte mbështetës i hershëm i të drejtave për abort, duke i thënë Philadelphia Inquirer në vitin 1972: “Si mjek, jam shumë i shqetësuar për shenjtërinë e jetës. Por është pikërisht për këtë arsye që ofroj aborte për gratë që i duan dhe u duhen.”

Megjithatë, Gosnelli krijoi polemika që në fillim të karrierës së tij. Gjatë të ashtuquajturit “Masakra e Ditës së Nënës e vitit 1972”, ai kreu 15 aborte të transmetuara në televizion mbi gra në tremujorin e dytë të shtatzënisë duke përdorur një top plastik të pajisur me tehe të mprehta që futej në mitër. Nëntë prej grave pësuan komplikacione dhe njëra pati nevojë për histerektomi, sipas një studimi të vitit 1974 të publikuar në Health Service Reports.

Po atë vit, Kermit Gosnelli hapi Women’s Medical Society në Perëndim të Filadelfias.

Kushtet tronditëse në Women’s Medical Society

Megjithëse Inquirer e përshkroi si një “njeri të respektuar” në Filadelfia dhe finalist për çmimin “Filadelfi i Ri i Vitit”, Gosnell kishte një borxh prej 41,000 dollarësh ndaj tatimeve federale deri në fund të viteve 1980. Kjo, me gjasë, e nxiti ta shndërronte klinikën në një vend me klientelë të madhe.

Women’s Medical Society ofronte planifikim familjar, shërbime gjinekologjike dhe aborte standarde, por shumë shpejt u përhap fjala se Gosnelli kryente aborte në fazë të vonë pa asnjë pyetje. Shumë nga klientet e tij ishin gra me të ardhura të ulëta që kërkonin aborte përtej kufirit ligjor 24-javor të Pensilvanisë.

Mjeku tarifonte nga 1600 deri në 3000 dollarë për çdo abort të tillë, duke fituar deri në 15,000 dollarë në ditë. Pavarësisht këtyre të ardhurave të mëdha, klinika ishte jashtëzakonisht e ndotur, dhe stafi i Gosnellit i pakualifikuar. Gratë merrnin qetësues dhe ilaçe që shkaktonin lindje dhe vendoseshin në tualete për të lindur. Stafi më pas nxirrte fetuset nga uji.

Nëse foshnjat ishin ende të gjalla, atyre u pritej palca kurrizore me gërshërë për t’i vrarë. Gratë më pas dërgoheshin në dhoma rikuperimi, ku uleshin në kolltuqe të papastra me batanije të përgjakura.

Pati shumë ankesa për Women’s Medical Society, por autoritetet e qytetit kaluan 16 vjet pa e inspektuar asnjëherë. Në fakt, vetëm pasi autoritetet morën një sinjalizim për një rrjet të shpërndarjes së barnave me recetë të paligjshme, krimet tronditëse të Kermit Gosnellit dolën në dritë.

Zbulimi i “Shtëpisë së tmerrit” në perëndim të Filadelfias

Në qershor të vitit 2008, Gosnelli thuhet se nisi të përshkruante ilegalisht ilaçe si oksikodon, alprazolam dhe kodeinë për pacientë që nuk kishin nevojë për to. Disa bënin ekzaminime të shkurtra, ndërsa të tjerë nuk e takonin asnjëherë doktorin. Thjesht telefononin, kërkonin barnat dhe i merrnin recetat që ai shkruante.

Ai tarifonte deri në 150 dollarë për recetën e parë dhe 20 dollarë për çdo rimbushje. Vetëm në janar të vitit 2010, ai shkroi të paktën 2300 receta të tilla. Pas një sinjalizimi për këtë rrjet, FBI bastisi Women’s Medical Society më 18 shkurt 2010, dhe pikërisht atëherë zbuluan përmasat e praktikave të tij me abortet e paligjshme.

Sipas një deklarate për shtyp të Komisionit të Dhomës së Përfaqësuesve për Drejtësinë në vitin 2014, autoritetet që hetuan “Shtëpinë e tmerrit” u tmerruan nga kushtet e papastërtisë në brendësi. “Banja pastrohej vetëm një herë në javë, pavarësisht se pacientet villnin në lavamanë dhe lindnin në tualete,” thuhej në deklaratë.

“Në total, mbetjet e 45 fetuseve u gjetën në klinikë atë mbrëmje dhe iu dorëzuan mjekësisë ligjore të Filadelfias, që konfirmoi se të paktën dy, dhe me shumë gjasë tre, kishin qenë të aftë për jetë jashtë barkut të nënës,” vazhdonte raporti.

Gjithashtu u zbulua se të paktën një grua, një refugjate 41-vjeçare nga Butani me emrin Karnamaya Mongar, vdiq nga mbidoza e barnave të administruara nga stafi i pa licencuar i Gosnellit.

Gjyqi penal ndaj Kermit Gosnellit

Gjyqi ndaj Kermit Gosnellit filloi në mars të vitit 2013 dhe zgjati disa javë. Prokurorët nuk ngurruan të paraqisnin prova grafike para jurisë, duke përfshirë foto të klinikës, mbetjet fetale të zbuluara dhe dëshmi nga ish-punonjës që pranuan se kishin marrë pjesë në vrasjen e foshnjave të sapolindura.

Në maj të vitit 2013, Gosnell u shpall fajtor për tri akuza për vrasje të shkallës së parë për vdekjen e foshnjave, si dhe për një akuzë për vrasje të pavullnetshme për vdekjen e Mongarit. Ai u shpall gjithashtu fajtor për dhjetëra akuza të tjera për keqpërdorim mjekësor dhe shkelje të ligjeve për abortin.

Mjeku i turpëruar hoqi dorë nga e drejta për apelim në këmbim të një dënimi me burgim të përjetshëm pa mundësi lirimi me kusht. Bashkëshortja e tij dhe disa ish-punonjës gjithashtu u shpallën fajtorë dhe u dënuan për rolin e tyre në këto krime.

“Aftësitë e mia në gjuhën angleze nuk mund ta përshkruajë siç duhet natyrën barbare të dr. Gosnellit,” tha Prokurori i Qarkut të Filadelfias, R. Seth Williams, duke shtuar: “Pensilvania nuk është një vend i botës së tretë. Ka pasur disa agjenci mbikëqyrëse që duhej ta kishin mbyllur Gosnellin shumë kohë më parë.”

Gosnelli vazhdon të jetë i burgosur në burgun e Huntingdon-it në Pensilvani. Ai ka dhënë shumë pak deklarata për mediat që nga dënimi i tij, por mban një qëndrim sfidues, duke argumentuar se gjithmonë ka vepruar në interes të pacientëve të tij.