Ministri i Jashtëm Francez Jean-Noël Barrot u bëri thirrje më shumë vendeve të njohin shtetësinë palestineze.

“Në Nju Jork me 14 vende të tjera, Franca nis një thirrje kolektive: Ne shprehim dëshirën tonë për të njohur Shtetin e Palestinës dhe ftojmë ata që nuk e kanë bërë ende këtë të bashkohen me ne”, shkroi Barrot në një postim në X, të shoqëruar nga një deklaratë e përbashkët e ministrave të jashtëm të bërë në një konferencë të Kombeve të Bashkuara në Nju Jork.

A New York avec 14 autres pays, la France lance un appel collectif : nous exprimons notre volonté de reconnaître l'Etat de Palestine et invitons ceux qui ne l’ont pas encore fait à nous rejoindre. pic.twitter.com/faCYTYwmES

— Jean-Noël Barrot (@jnbarrot) July 30, 2025

Deklarata u nënshkrua nga ministrat e jashtëm të Andorrës, Australisë, Kanadasë, Finlandës, Francës, Islandës, Irlandës, Luksemburgut, Maltës, Zelandës së Re, Norvegjisë, Portugalisë, San Marinos, Sllovenisë dhe Spanjës.

Ministrat dënuan sulmet e 7 tetorit 2023 nga Hamasi; i bënë thirrje grupit terrorist që të lirojë menjëherë të gjithë pengjet që mban ende; shprehën mbështetje për një zgjidhje me dy shtete në Lindjen e Mesme; dhe u bënë thirrje të tjerëve të njohin shtetësinë palestineze përpara Asamblesë së Përgjithshme të Kombeve të Bashkuara në shtator. Ata gjithashtu shprehën "shqetësim të thellë" për numrin e madh të viktimave civile dhe situatën humanitare në Gaza, ndërsa lufta e Izraelit vazhdon në enklavën bregdetare.

Presidenti francez Emmanuel Macron njoftoi javën e kaluar se vendi i tij do ta njihte Palestinën si shtet në Asamblenë e Përgjithshme të OKB-së, duke shkaktuar dënimin e kryeministrit izraelit Benjamin Netanyahu, i cili tha se ky veprim “shpërblen terrorin”. Sekretari i Shtetit i SHBA-së Marco Rubio e quajti vendimin “të pamatur”.

Një zyrtar diplomatik francez kundërshtoi kritikat, duke argumentuar se ky veprim mund t’i shtyjë “partnerët kryesorë arabë dhe myslimanë” të “ndërmarrin hapa” drejt “izolimit të Hamasit” duke rënë dakord të mbështesin një çarmatim të plotë të grupit islamist dhe përjashtimin e tij nga çdo qeverisje e ardhshme palestineze në këmbim të njohjes së shtetësisë.

Kryeministri britanik Keir Starmer ndërmori hapa në drejtim të Francës të martën, duke njoftuar se Mbretëria e Bashkuar do ta njohë shtetësinë palestineze nëse qeveria izraelite nuk ndërmerr "hapa thelbësorë" për t'i dhënë fund krizës në Gaza./ Politico.