Nga Andrew Kerr, WASHINGTON FREE BEACON

Vrasjet dhe lloje të tjera të krimeve të dhunshme po bien me ritme të shpejta në qytetin e kriminalizuar të Baltimorës në SHBA.

Kjo rënie nisi pak pasi votuesit shkarkuan prokuroren progresiste të mbështetur nga Soros në vitin 2022 — dhe ekspertët thonë se nuk është rastësi.

Shkalla e vrasjeve në Baltimore u rrit ndjeshëm pasi prokurorja e shtetit, Marilyn Mosby, mori detyrën në vitin 2015 me një platformë progresiste që përfshinte refuzimin për të ndjekur penalisht krimet e nivelit të ulët dhe akuzimin agresiv të oficerëve të policisë, përfshirë ata të përfshirë në vdekjen e Freddie Gray, një burrë me ngjyrë që vdiq nga plagët e marra gjatë ndalimit.

Edhe pse oficerët përfundimisht u shpallën të pafajshëm, politikat e Mosby ndikuan negativisht në Departamentin e Policisë së Baltimorës. Arrestimet ranë ndjeshëm gjatë mandatit të saj, ndërsa numri i vrasjeve u rrit nga një mesatare prej 229 në vit përpara se të merrte detyrën, në 333 në vit gjatë tetë viteve të saj si prokurore, sipas të dhënave të mbledhura nga Heritage Foundation.

Deri në korrik të vitit 2022, votuesit e Baltimorës e kishin humbur durimin. Mosby humbi zgjedhjet paraprake ndaj rivalit të saj demokrat, Ivan Bates, i cili premtoi të përmbyste politikat e saj progresiste të mos-ndjekjes penale dhe të vendoste dënime më të ashpra për përsëritësit e krimeve të dhunshme dhe për posedimin e paligjshëm të armëve.

Nga të gjitha shenjat, duket se funksionoi.

Në vitin 2022, vitin e fundit të Mosby në detyrë, Baltimora regjistroi 334 vrasje në të gjithë qytetin. Vitin tjetër, nën drejtimin e Bates, ky numër ra në 262. Në vitin 2024, ra edhe më tej në 202 vrasje. Dhe gjatë gjysmës së parë të vitit 2025, Baltimora regjistroi vetëm 68 vrasje — një rënie prej 62% krahasuar me të njëjtën periudhë në 2022.

Edhe vjedhjet e makinave kanë rënë me 34%, grabitjet me 22% dhe zjarrvëniet me 10% në Baltimore, deri më tani në vitin 2025 krahasuar me të njëjtën periudhë të vitit të kaluar.

“Shifrat nuk gënjejnë,” tha Sean Kennedy, studiues në Maryland Public Policy Institute, për Washington Free Beacon. “Modeli i Ivan Bates për të shënjestruar kriminelët më të dhunshëm ose me prirje për dhunë (kriminelë që mbajnë armë) është faktori kryesor i suksesit të jashtëzakonshëm të Baltimorës.”

"Vrasjet nisën të bien vetëm kur Bates erdhi dhe dha sinjalin se mbajtja e armëve do të thoshte burg," tha Kennedy.

Ndërkohë që krimi i dhunshëm përhapej pa kontroll në Baltimorë gjatë kohës që Mosby ishte në detyrë (2015 deri në fillim të 2023), ajo shpesh mungonte. Ajo pushonte në hotele me pesë yje në Gjermani dhe Portugali gjatë 23 udhëtimeve jashtë vendit që bëri në vitet 2018 dhe 2019 — disa prej të cilave ishin sponsorizuar nga organizata jofitimprurëse, përfshirë Fair and Just Prosecution, një grup i financuar nga Open Society Foundations i George Soros, që trajnon dhe mbështet prokurorë progresistë.

Në janar 2022, një juri federale e akuzoi Mosby-n për mashtrim hipotekor dhe dëshmi të rreme lidhur me dy shtëpitë e saj të pushimit në Florida. Ajo u shpall fajtore në vitin 2024, por një gjykatë apeli hodhi poshtë dënimin për mashtrim hipotekor në fillim të këtij muaji.

Për Rafael Mangual, drejtor i Policing and Public Safety Initiative në Manhattan Institute, ndryshimi në Baltimore gjatë kohës së Bates pasqyron një të vërtetë të thjeshtë për rendin dhe ligjin, që sipas tij Mosby dhe prokurorët e tjerë progresistë të mbështetur nga Soros e kishin humbur nga sytë: "Nuk ekziston asnjë vend që ka arritur të kontrollojë problemin e krimit pa përfshirjen e policisë, prokurorëve dhe burgjeve," tha Mangual për Free Beacon. "Kaq".

Që nga viti 2022, pothuajse dy duzina prokurorësh të mbështetur nga Soros janë shkarkuar nga votuesit në mbarë SHBA-në, përfshirë prokurorin e qarkut të Los Anxhelosit George Gascón dhe atë të Çikagos Kimberly Fox, përveç Marilyn Mosby. Qytetet e mëdha kanë filluar të rikthejnë politikat e forta të policimit që nga viti 2022, dhe sipas një studimi të majit 2025 nga Law Enforcement Legal Defense Fund, kjo ka sjellë një "korrelacion statistikisht të rëndësishëm" me uljen e krimit të dhunshëm.