Historia e plotë dhe e pathënë e kthesës së Trump-it për Ukrainën

Ishte mëngjesi i 4 Korrikut kur telefoni i gjeneral Keith Kellogg-ut ndriçoi nga një telefonatë nga Polonia.

Në anën tjetër të linjës ishte Radoslaw Sikorski, ministri i Jashtëm i Polonisë, me atë që mund të jetë një nga ndërhyrjet përcaktuese të pushtimit të plotë të Ukrainës nga Rusia.

Gjatë natës, konsullata polake në qendër të Kievit ishte dëmtuar nga një breshëri raketash dhe dronësh rusë.

"Putini po tallet me përpjekjet tuaja për paqe," i tha Sikorski gjeneral Kellogg-ut, një gjeneral në pension me gradën e gjenerallejtënantit, i cili shërben si i dërguari kryesor i Donald Trump-it për Ukrainën.

"Ju lutem riktheni furnizimet me municione kundërajrore për Ukrainën," shtoi ai.

Dërgesat me armë ishin pezulluar papritur dy ditë më parë, duke bërë që shumëkush të besonte se administrata Trump po e braktiste sërish Ukrainën.

Gjatë telefonatës, ishte paralajmërimi për sulmin ndaj ambasadës që duket se pati më shumë jehonë te gjeneral Kellogg-u.

Si një gjeneral me tre yje në pension, ai e dinte se kjo ishte lloj ngjarjeje që çon në përshkallëzim të luftës dhe përfundimisht në humbje kontrolli.

Ajo që ndodhi më pas mund të shihet si hapi i parë në një seri ngjarjesh që sollën kthesën e Trump-it për Ukrainën.

Pothuajse menjëherë pas përfundimit të telefonatës me Sikorskin, gjeneral Kellogg-u mori në telefon presidentin.

Trump u përgjigj pothuajse menjëherë.

Pas urimeve për 4 Korrikun dhe komplimenteve për “one, big, beautiful bill”, të dy kaluan te çështja e Ukrainës.

Gjatë natës, Kievi ishte goditur nga 11 raketa dhe 539 dronë, në atë që ishte breshëria më e madhe ruse kundër kryeqytetit ukrainas që nga fillimi i luftës.

Më me rëndësi, sulmet ndodhën vetëm pak orë pasi Vladimir Putini, presidenti rus, dhe Trump kishin folur në telefon për të diskutuar fundin e luftës.

Dihej tashmë se presidenti amerikan ishte zemëruar me refuzimin e homologut rus për të ndalur sulmet ndaj qyteteve ukrainase, ndërsa kishte hedhur poshtë një ofertë amerikane për armëpushim.

Gjeneral Kellogg-u e informoi shefin e tij për sulmin më të fundit dhe si ambasada e një aleati të NATO-s, Polonia, ishte prekur nga goditjet.

I dërguari përdori më pas telefonatën për të nxitur rifillimin e dërgesave të raketave mbrojtëse Patriot për Ukrainën.

U diskutua rreth rreziqeve dhe përfitimeve të shtimit të aksesit të Kievit ndaj raketave tokë-ajër të prodhimit amerikan dhe interceptorëve që lëshohen prej tyre.

Përgjigjja e Trump-it ishte e menjëhershme: t’i thuhej Pentagonit të çlironte disa nga sistemet Pac-3 që ishin bllokuar përkohësisht për shkak të ngrirjes së ndihmës amerikane, ndërsa po vlerësoheshin rezervat.

Ai gjithashtu urdhëroi gjeneral Kellogg-un të kontaktonte Pete Hegseth-in, sekretarin amerikan të mbrojtjes, për të rifilluar dërgesat për Kievin.

Më herët ishte zbuluar se Trump kishte mbetur i befasuar kur Hegseth-i kishte autorizuar një pauzë në ndihmën për Ukrainën pa informuar Shtëpinë e Bardhë apo Kongresin.

Figura si gjeneral Kellogg-u dhe Marco Rubio, sekretari i shtetit dhe këshilltari i sigurisë kombëtare, e mësuan vendimin nga mediat.

Por kësaj here do të ishte ndryshe dhe Gjeneral Kellogg e siguroi këtë. Kur i telefonoi Hegseth-it, i tha atij për vendimin e presidentit për të rifilluar dërgesat e raketave Patriot në Ukrainë.

I tha gjithashtu se nëse nuk e besonte, mund t'i telefononte vetë Trump-it.

Gjithashtu me 4 Korrik, presidenti amerikan i premtoi Volodymyr Zelensky-t, presidentit të Ukrainës, se më në fund do ta ndihmonte me nevojat e mbrojtjes ajrore të Kievit.

Privatisht, ndër mbështetësit më të zjarrtë të Ukrainës në Uashington, kjo u pa si hera e parë që Trump kishte kuptuar rëndësinë e përdorimit të fuqisë amerikane për të forcuar pozitat e Kievit si një rrugë e mundshme drejt paqes.

Megjithatë, Pentagonit iu deshën të paktën katër ditë për të vënë në lëvizje pjesën e parë të raketave Patriot.

Kishte 40 interceptorë Pac-3 të porositura nga administrata e ish-presidentit Joe Biden në Poloni për Ukrainën. Një duzinë prej tyre u çliruan pas telefonatës së Trump-it me gjeneral Kellogg-un.

Kjo kthesë u përqafua menjëherë nga kryeqytetet europiane, të bindura se mund të bindnin presidentin amerikan të shkonte më tej në mbështetjen për Kievin.

Friedrich Merz, kancelari i Gjermanisë, filloi të ofronte blerjen e sistemeve Patriot që do të dërgoheshin për të forcuar mbrojtjen e vendit në luftë.

Mark Rutte, sekretari i përgjithshëm i NATO-s, shkoi edhe më tej, duke i ofruar Trump-it mundësinë që të rimbursohej nga aleatët europianë dhe Kanadaja në vlerë miliarda dollarësh për armë amerikane të dërguara në Ukrainë.

Ishte një marrëveshje që presidenti amerikan e përqafoi me kënaqësi, i këshilluar në heshtje nga figura si gjeneral Kellogg-u, se fakti që vendet europiane po paguanin për armët amerikane të dërguara në Europë ishte një demonstrim i parimeve të tij “Ta Bëjmë Amerikën të Madhe Sërish”.

Këto armë jo vetëm do të bindnin Putinin të ulej në tryezën e bisedimeve, por gjithashtu do të shfaqnin efikasitetin e armëve amerikane gjatë një përpjekjeje europiane për t’u riarmatosur përmes prodhimit të brendshëm.

Trump-it iu deshën vetëm edhe nëntë ditë për të shpallur, së bashku me Rutte-n, planin e ndihmës 10 miliardë dollarëshe me 13 korrik, si dhe perspektivën e tarifave të ashpra tregtare ndaj Rusisë dhe çdo vendi që blinte karburantet e saj fosile.

Deri në fund të asaj jave, një sistem mbrojtës ajror Patriot dhe interceptor shtesë kishin mbërritur tashmë në Ukrainë, falë një marrëveshjeje me Gjermaninë.

Pentagoni dhe Shtëpia e Bardhë e përdorën atë veprim për të përpjekur të bindnin vendet europiane të rrezikonin duke dërguar rezervat e tyre në Kiev, ndërsa prisnin që SHBA t’ua zëvendësonte.

Megjithatë, për disa vende kjo është një kërkesë e vështirë, duke qenë se sistemet e tyre Patriot nuk do të zëvendësohen deri në fillim të vitit të ardhshëm.

Më herët këtë javë, Berlini shpalli një marrëveshje me Uashingtonin për të dhuruar edhe pesë sisteme të tjera për Ukrainën.

Gjermania do të financojë dy nga sistemet, ndërsa Norvegjia ka premtuar të paguajë për një të tretë.

Zëvendësimet pritet të vijnë nga porosi që ishin premtuar më parë për Zvicrën.

Javën e kaluar, Berna bëri të ditur se ishte informuar nga Uashingtoni se dërgesat që ishin destinuar për vendin neutral po devijoheshin për të ndihmuar Kievin.

Trump-it iu tha se devijimi i porosisë zvicerane do të ndihmonte në lirimin e sistemeve të nevojshme për të mbështetur Ukrainën.

Në vitin 2022, Zvicra kishte porositur pesë sisteme Patriot, me pritshmërinë që dërgesat të fillonin në vitin 2026 dhe të përfundonin dy vjet më vonë. / The Telegraph - Syri.Net