Qeveria italiane e ka mirëpritur lajmin e arritjes së një marrëveshje mes Bashkimit Evropian dhe Shteteve të Bashkuara mbi tarifat doganore dhe politikat tregtare, të njoftuar nga presidenti Donald Trump dhe Presidentja e Komisionit Europian, Ursula von der Leyen.

‘Zgjidhja e arritur përmes negociatave është një rezultat për të cilin institucionet evropiane dhe shtetet anëtare, përfshirë Italinë, kanë punuar me përkushtim të madh dhe në frymën e bashkëpunimit, duke shmangur grackën e atyre që kërkonin të nxisnin një përplasje të drejtpërdrejtë mes dy brigjeve të Atlantikut. Marrëveshja garanton stabilitet, një element thelbësor për marrëdhëniet midis dy sistemeve ekonomike dhe sipërmarrëse, të cilat janë fort të ndërvarura, siç janë ato të Bashkimit Evropian dhe Shteteve të Bashkuara’, thuhet në deklaratën e kryeministres italiane Giorgia Meloni dhe Zëvendëskryeministrave Antonio Tajani dhe Matteo Salvini.

Deklarata e Kryeministres italiane Giorgia Meloni dhe Zëvendëskryeministrave Antonio Tajani dhe Matteo Salvini

“Qeveria italiane e mirëpret lajmin për arritjen e një marrëveshjeje mes Bashkimit Evropian dhe Shteteve të Bashkuara mbi tarifat doganore dhe politikat tregtare, e cila shmang rrezikun e një lufte tregtare brenda Perëndimit, që do të sillte pasoja të paparashikueshme.

Zgjidhja e arritur përmes negociatave është një rezultat për të cilin institucionet evropiane dhe shtetet anëtare, përfshirë Italinë, kanë punuar me përkushtim të madh dhe në frymën e bashkëpunimit, duke shmangur grackën e atyre që kërkonin të nxisnin një përplasje të drejtpërdrejtë mes dy brigjeve të Atlantikut.

Marrëveshja garanton stabilitet, një element thelbësor për marrëdhëniet midis dy sistemeve ekonomike dhe sipërmarrëse, të cilat janë fort të ndërvarura, siç janë ato të Bashkimit Evropian dhe Shteteve të Bashkuara.

Duke pritur të vlerësojmë detajet e marrëveshjes, e konsiderojmë të qëndrueshme bazën e saj mbi tarifat doganore prej 15%, sidomos nëse kjo përqindje përfshin dhe nuk shtohet mbi tarifat ekzistuese, siç ishte parashikuar fillimisht.

Në të njëjtën kohë, ne vazhdojmë të punojmë në Bruksel për të forcuar Tregun Unik, për të thjeshtuar rregullat tona, për të shkurtuar burokracinë, për të diversifikuar marrëdhëniet tregtare dhe për të reduktuar varësitë tona. Së fundmi, jemi gati të aktivizojmë masa mbështetëse në nivel kombëtar, por kërkojmë që ato të aktivizohen edhe në nivel evropian për sektorët që mund të preken veçanërisht nga masat tarifore amerikane.

Qeveria italiane do të vazhdojë të ndjekë objektivin e ruajtjes së unitetit të qëndrueshëm të Perëndimit, me ndërgjegjësimin se çdo ndarje do të na bënte të gjithëve më të dobët dhe më të ekspozuar ndaj sfidave globale.”