Nënat në Gaza zgjohen natën për të kontrolluar nëse fëmijët e tyre të uritur janë ende gjallë

Çdo mbrëmje, Najah Hashem Darbakh shkon për të fjetur, pa e ditur nëse foshnja e saj do të zgjohet të nesërmen në mëngjes.

Vajza e saj, Sila 11-muajshe, është një nga 1 milion fëmijët në Gaza që përballen me urinë dhe kequshqyerjen — pasi rrethimi i Gazës nga Izraeli pas sulmeve të 7 tetorit të udhëhequra nga Hamasi, ka shkaktuar uri vdekjeprurëse tek palestinezët.

“Vetëm në këtë dhomë, katër fëmijë kanë vdekur nga kequshqyerja”, tha Darbakh për CNN të premten. “Jam e tmerruar se mos vajza ime është e pesta.”

Foshnja palestineze, e zhvendosur në Spitalin Nasser në Khan Younis, vuan nga diarre kronike, tha Darbakh. Ajo peshon vetëm tre kilogramë (rreth 6.6 paund).

«Absolutisht nuk mund t’i siguroj qumësht», shtoi Darbakh. «Çdo natë zgjohem katër ose pesë herë vetëm për t’u siguruar që vajza ime po bën tinguj, për t’u siguruar se është ende gjallë».

Disa nëna në Gaza i thanë CNN-së se nuk mund të gjejnë qumësht të mjaftueshëm për të ushqyer foshnjat e tyre. Të tjera mbështeten te çaji i kamomilit ose uji, ndërsa stoqet e formulës për foshnje po pakësohen.

Më në veri, Hidaya Al Mtawwaq mban në krahë djalin e saj 3-vjeçar, Mohammad, brenda një tendë të zhveshur pranë Spitalit Al-Ahli Al-Arabi në qytetin e Gazës. Ai peshon vetëm 6 kilogramë (rreth 13 paund) - nga 9 kilogramët (rreth 20 paund) disa muaj më parë.

«Ai nuk mund të qëndrojë në këmbë», tha Al Mtawwaq për CNN. «Nëse ka ushqim, ne hamë. Nëse nuk ka, nuk kemi fuqi tjetër përveçse të mbështetemi te Zoti».

«Ku duhet të shkoj?» shtoi nëna. «Jeta na ka lodhur vërtet.»/ CNN.