Arabia Saudite premton të dhurojë 5.6 miliardë dollarë për Sirinë

Mbretëria e Arabisë Saudite njoftoi të mërkurën se do të lidhë së shpejti marrëveshje për partneritet dhe investime me vlerë 5.6 miliardë dollarë në sektorë të ndryshëm me Sirinë, ku autoritetet e reja de facto shprehen se duan të rimëkëmbin ekonominë pas gati një dekade e gjysmë lufte shkatërruese.

Rijadi është ndër mbështetësit kryesorë të autoriteteve të reja siriane, të cilat morën pushtetin në dhjetor pasi rrëzuan ish-presidentin Bashar al-Asad pas 14 vjet lufte.

Një delegacion i madh saudit, me rreth 150 përfaqësues nga sektori publik dhe privat, i udhëhequr nga ministri saudit i Investimeve, Khaled al-Faleh, mbërriti dje në Damask, sipas Ministrisë Saudite të Investimeve dhe rrjetit shtetëror televiziv Al Ikhbariya.

Delegacioni do të marrë pjesë në një forum dypalësh investimesh sot, tha një zëdhënës i ministrisë për Agjencinë Franceze të Lajmeve (AFP).

Gjatë eventit do të nënshkruhen marrëveshje dhe protokolle që ‘do të kontribuojnë drejtpërdrejt në zhvillimin e Sirisë’, sipas një njoftimi të ministrisë.

Investimet e njoftuara, me vlerë ‘21 miliardë riyalë sauditë (rreth 5.6 miliardë dollarë)’, do të përfshijnë sektorë jetikë dhe strategjikë si pasuritë e paluajtshme, infrastrukturat, komunikacionet dhe teknologjinë e informacionit, transportin dhe furnizimin, industrinë, turizmin, energjinë, tregtinë etj., gjithmonë sipas ministrisë, e cila rriti vlerësimin paraprak prej 19 miliardë riyalësh.

Ministri sirian i Informacionit, Hamza al-Mustafa, deklaroi gjatë një konference për shtyp se në forum do të nënshkruhen '44 marrëveshje me Mbretërinë e Arabisë Saudite', me vlerë '6 miliardë dollarë'.

Presidenti amerikan Donald Trump nënshkroi të hënën një urdhër ekzekutiv që formalizoi heqjen e sanksioneve amerikane ndaj Sirisë, një hap i ri drejt përmirësimit të marrëdhënieve midis Uashingtonit dhe Damaskut pas rrëzimit të ish-presidentit Asad.

Republikani njoftoi heqjen e sanksioneve në maj gjatë një vizite në Arabinë Saudite, ku pati një takim shumë të komentuar me presidentin e përkohshëm sirian, Ahmed al-Sarra. Ky i fundit vizitoi Rijadin në shkurt, duke bërë udhëtimin e tij të parë jashtë vendit.

Arabia Saudite dhe Katari kanë premtuar gjithashtu të rregullojnë borxhin e Sirisë pranë Bankës Botërore, i cili vlerësohet të jetë rreth 15 miliardë dollarë.

Megjithatë, pavarësisht premtimeve për bashkim kombëtar, autoritetet e reja në Damask po hasin vështirësi në ruajtjen e rendit. Një valë ngjarjesh të dhunshme së fundmi ringjalli dyshimet mbi aftësinë e tyre për të menaxhuar tensionet midis komuniteteve.

Ngjarje të dhunshme tronditën provincën Suweida pas përleshjeve midis luftëtarëve druza dhe beduinëve sunitë kundërshtarë, të cilat u përhapën shpejt. Izraeli ndërhyri duke bombarduar pozicione të forcave të autoriteteve të reja dhe objekte qeveritare, duke pretenduar se synimi ishte mbrojtja e minoritetit druza dhe krijimi i një zone demilitarizuese në jug të Sirisë.

Sipas organizatës joqeveritare Syrian Observatory for Human Rights, mbi 1,300 persona, kryesisht druza, u vranë në këto ngjarje. Një armëpushim hyri në fuqi të dielën pas një jave përleshjesh. Syri.net-CNN.gr