Tension në Samitin BE-Kinë: Xi Jinping kritikon Brukselin dhe kërkon trajtim të drejtë të 'dallimeve dhe fërkimeve'

Presidenti kinez Xi Jinping i bëri thirrje Bashkimit Evropian të enjten që të trajtojë “siç duhet dallimet dhe fërkimet”, duke kritikuar masat e fundit tregtare të Brukselit kundër Pekinit në një samit të tensionuar të zhvilluar në Pekin.

Takimi, që shënonte 50-vjetorin e marrëdhënieve diplomatike mes BE-së dhe Kinës, u reduktua në vetëm një ditë me kërkesë të Kinës, në sfondin e përshkallëzimit të mosmarrëveshjeve dypalëshe.

“Sfidat aktuale me të cilat përballet Evropa nuk vijnë nga Kina,” deklaroi Xi përpara Presidentes së Komisionit Evropian, Ursula von der Leyen, dhe Presidentit të Këshillit Evropian, Antonio Costa. Ai theksoi se ndërtimi i “mureve dhe fortesave” dhe ndarja e zinxhirëve të furnizimit do të çonte vetëm në izolim dhe jo në përmirësim të konkurrueshmërisë.

Xi kërkoi nga BE të përmbahet nga “masat kufizuese ekonomike dhe tregtare” dhe të ruajë hapjen e tregut të investimeve. Ndërkohë, Brukseli ka ndërmarrë hetime ndaj eksporteve kineze të automjeteve elektrike dhe ka ngritur shqetësime për mbikapacitetin industrial të Kinës.

Von der Leyen, në takimin me liderin kinez, theksoi se marrëdhëniet kanë hyrë në një “pikë kthese” dhe kërkoi “zgjidhje të vërteta” për deficitin tregtar historik të BE-së me Kinën, që vitin e kaluar arriti në 305.8 miliardë euro. Ajo nënvizoi nevojën për rritje të aksesit në tregun kinez për kompanitë evropiane dhe për uljen e kufizimeve të eksportit.

Megjithë tensionet, von der Leyen e përshkroi takimin me Xi si “të shkëlqyer”, ndërsa mbetet për t’u parë nëse palët do të arrijnë një rrugë të përbashkët për të balancuar interesat tregtare dhe gjeopolitike.