Donald Trump paralajmëron Iranin, e kërcënon me sulme të reja

Presidenti Donald Trump ka deklaruar se do të godasë sërish objektet bërthamore të Iranit “nëse është e nevojshme,” duke përsëritur paralajmërimin e tij ndaj Teheranit që të heqë dorë nga ambiciet për pasurimin e uraniumit.

Trump iu referua komenteve të ministrit të Jashtëm iranian, Abbas Araghchi, gjatë një interviste me gazetarin e Fox News, Bret Baier, ku diplomati përshkroi shkallën e dëmeve të shkaktuara nga sulmet amerikane ndaj objekteve kryesore bërthamore të vendit të tij më 22 qershor.

Araghchi tha se objektet e pasurimit ishin “shkatërruar.”

“Sigurisht që janë shkatërruar, ashtu siç e thashë, dhe do ta bëjmë sërish, nëse është e nevojshme!” shkroi Trump në platformën e tij Truth Social të hënën, me 21 korrik, duke kritikuar raportimet e mëparshme të mediave që kishin vënë në dyshim nivelin e dëmit të shkaktuar.

Newsweek ka kontaktuar ministrinë e Jashtme iraniane për koment.

Postimi i Trump-it ishte një sulm ndaj një raporti të CNN, që citonte një vlerësim të hershëm të inteligjencës amerikane, sipas të cilit sulmet nuk e kishin shkatërruar programin bërthamor të Iranit, por vetëm e kishin vonuar për disa muaj.

Trump e interpretoi deklaratën e Araghchi-t si dëshmi se sulmet amerikane kishin ndaluar aftësinë e Iranit për të zhvilluar një bombë bërthamore. Megjithatë, ministri i Jashtëm shtoi se Teherani do të vazhdojë pasurimin e uraniumit si një çështje “krenarie kombëtare,” duke sugjeruar se ambiciet atomike nuk kanë marrë fund.

Trump po reagonte ndaj deklaratave të Araghchi-t gjatë intervistës me Fox News, ku ky i fundit tha se objektet bërthamore të vendit të tij ishin dëmtuar rëndë.

Araghchi tha se dëmet po vlerësoheshin nga hetues iranianë dhe se do të ishte e mundur për inspektorët e OKB-së të shqyrtonin vendet bërthamore të Iranit.

Ai nuk pranoi as mohoi nëse uraniumi i pasuruar u kishte mbijetuar sulmet amerikane, por tha se Teherani do të ofronte detaje për Agjencinë Ndërkombëtare për Energjinë Atomike (IAEA). IAEA më herët kishte deklaruar se nuk e dinte se çfarë kishte ndodhur me uraniumin e pasuruar të Iranit.

Araghchi tha se Irani mund të dëshmojë se programi i tij bërthamor është për qëllime paqësore, gjë që mund të çojë në heqjen e sanksioneve, një zhvillim që ai e përshkroi si një situatë “fitoreje për të dyja palët,” për Teheranin dhe Uashingtonin.

Ministri i Jashtëm shtoi gjithashtu se Irani ka ndalur përkohësisht programin e pasurimit të uraniumit për shkak të dëmeve të shkaktuara nga sulmet amerikane, por se vendi i tij do të vazhdojë me programin pasi kjo është një çështje krenarie kombëtare.

Trump reagoi në rrjetet sociale duke sulmuar CNN-in për raportimin dhe duke përsëritur qëndrimin e administratës së tij se vendet bërthamore të Iranit ishin “shkatërruar plotësisht.”

Ministri i Jashtëm iranian Abbas Araghchi i tha Fox News: “Objektet tona janë dëmtuar, janë dëmtuar rëndë.”

Ai shtoi: “Nuk mund të heqim dorë nga pasurimi, sepse është një arritje e shkencëtarëve tanë. Dhe tani, më shumë se kaq, është një çështje krenarie kombëtare.”

Presidenti Donald Trump në Truth Social: “Ministri i Jashtëm i Iranit, Abbas Araghchi, për vendet bërthamore të Iranit: ‘Dëmet janë shumë të rënda, janë shkatërruar.’ Sigurisht që janë shkatërruar, ashtu siç e thashë, dhe do ta bëjmë sërish, nëse është e nevojshme!”

Komentet e Araghchit dhe reagimi i Trump-it ndaj tyre vijnë para bisedimeve të mëtejshme bërthamore midis Iranit dhe Mbretërisë së Bashkuar, Francës dhe Gjermanisë, të njohura si E3, të planifikuara për t’u mbajtur në Stamboll të premten. / Newsweek