Grupi mbikëqyrës kërkon hetim ndaj OJQ-ve të mbështetura nga Soros për keqpërdorim të statusit të përjashtimit nga tatimet

Një grup konservator mbikëqyrës po i kërkon Shërbimit të të Ardhurave të Brendshme të SHBA-ve (IRS) të hetojë statusin e përjashtimit nga tatimi të dy organizatave jofitimprurëse të financuara nga George Sorosi, me pretendimin se kanë keqpërdorur këtë status për të promovuar kauza të së majtës.

Reclaiming Americans Freedom (RAF), një grup avokues që përqendrohet në mbrojtjen e të drejtave civile dhe kushtetuese, depozitoi një ankesë formale pranë IRS-së të premten, duke akuzuar Private Equity Stakeholder Project (PESP) dhe degën e saj, Private Equity Stakeholder Action (PESA), për shkelje “të rënda dhe të qëllimshme” të ligjeve federale tatimore. RAF pretendon se të dyja organizatat kanë shfrytëzuar në mënyrë të paligjshme statusin e tyre jofitimprurës për të kryer “aktivitete politike të tepërta si qëllimin e tyre kryesor, duke përfituar padrejtësisht kandidatët demokratë dhe Partinë Demokratike”.

“Private Equity Stakeholder Project e ka keqpërdorur hapur statusin e saj jofitimprurës dhe ka fshehur qëllimisht shpenzimet e saj nga transparenca publike,” tha një zëdhënës i RAF për Daily Caller News Foundation. “Për shkak të natyrës së rëndë të këtyre shkeljeve, IRS duhet të kryejë një hetim të plotë mbi aktivitetet e PESP-së e të shqyrtojë heqjen e statusit të tyre jofitimprurës. Nëse IRS arrin në të njëjtat përfundime si ne, këto shkelje duhet të referohen menjëherë edhe në Departamentin e Drejtësisë.”

PESP, një organizatë 501(c)(3) me qendër në Çikago, e themeluar në vitin 2017, ka si qëllim “të kryejë dhe të shpërndajë kërkime, studime dhe analiza lidhur me ndikimin e firmave të shërbimeve financiare mbi grupet e interesit, përfshirë të drejtat e njeriut, punësimin, strehimin, konsumatorët dhe mjedisin,” sipas dokumenteve të saj tatimore. Dega e saj, PESA, organizatë 501(c)(4), e përshkruan misionin e saj si zhvillimi i “politikave dhe zgjidhjeve legjislative për çështje mjedisore, sociale dhe të qeverisjes, që lidhen me investimet e firmave të shërbimeve financiare, përfshirë firmat e kapitalit privat, fondet spekulative dhe fondet e infrastrukturës.”

PESP ka dënuar publikisht firmat e kapitalit privat për “shkatërrimin e bizneseve amerikane dhe eliminimin e vendeve të punës.” Të dyja organizatat, PESP dhe PESA, kanë marrë miliona dollarë nga fondacione të mëdha të majta, përfshirë Open Society Foundation të George Sorosit, Ford Foundation dhe Surdna Foundation, të cilat vetë kanë investime të konsiderueshme në industrinë e kapitalit privat.

Sipas ligjit federal, organizatat 501(c)(3) ndalohen të marrin pjesë ose të ndërhyjnë, drejtpërdrejt ose tërthorazi, në ndonjë fushatë politike për poste publike, në nivel kombëtar, shtetëror apo lokal. Ndërkohë, organizatat 501(c)(4) lejohen të përfshihen vetëm në aktivitete politike të kufizuara, që zakonisht nuk duhet të tejkalojnë 50% të shpenzimeve totale. RAF pretendon se ka “prova të forta që tregojnë se qëllimi kryesor i PESA gjatë viteve 2020 dhe 2022 ishte të kryente veprimtari politike në mbështetje të Partisë Demokratike, në vend të ndonjë veprimtarie të ligjshme sociale.”

Më konkretisht, në vitin 2020, PESA dha një kontribut prej 10,000 dollarësh për Shoqatën e Arkëtarëve Demokratë dhe 5000 dollarë për një kandidat demokrat për arkëtar shteti në Oregon, shpenzime që përbënin mbi 36% të totalit të shpenzimeve të saj, sipas ankesës së RAF. Në vitin 2022, ajo dhuroi mbi 54,000 dollarë në kontribute politike, të gjitha në favor të kandidatëve dhe organizatave demokrate.

Megjithëse shpenzimet politike direkte të PESA-s mbeten nën kufirin 50% për organizatat 501(c)(4), RAF pretendon se “veprimtaria e vetme tjetër e PESA-s gjatë këtyre dy viteve ishte rimbursimi i PESP sipas një marrëveshjeje për ndarjen e kostove”.

Sipas dokumenteve tatimore, disa nga këto veprimtari politike mund të jenë kryer nga PESP dhe më pas të jenë rimbursuar nga PESA, çka do të përbënte një shkelje të kufizimeve të rrepta që i vendosen organizatave jofitimprurëse lidhur me pjesëmarrjen në fushata politike.

“Kjo marrëveshje ngre pikëpyetje të mëdha nëse PESP ka financuar në mënyrë të ndaluar aktivitetin politik të kryer nga PESA, veçanërisht duke marrë parasysh që të dyja entitetet kontrollohen nga të njëjtat borde,” thuhet në ankesë.

Përveç veprimtarive politike, RAF akuzon PESP dhe PESA se kanë shkelur rregullat e IRS-së duke u angazhuar në aktivitete tregtare të palidhura me qëllimin jofitimprurës, pa paguar tatimet përkatëse. Të dyja organizatat kanë gjeneruar të ardhura të konsiderueshme të përshkruara si “të ardhura nga shërbimet e programit”, përfshirë konsulencë, kërkime dhe “mbështetje për punëtorët”, që sipas ankesës mund të përbëjnë aktivitet komercial të tatueshëm.

RAF gjithashtu akuzon PESP-ën për përdorim të gjuhës nxitëse dhe fyese që shkel standardet e IRS për organizatat arsimore jofitimprurëse, në mbështetje të pozicioneve të saj kundër kapitalit privat. Për më tepër, pretendohet se PESP nuk ka deklaruar plotësisht shpenzimet e saj në dokumentet tatimore, duke fshehur shpenzimet nga mbikëqyrja publike.

“Ne nuk e kemi parë ende ankesën. PESP dhe PESA janë në përputhje të plotë me ligjet federale tatimore,” tha Jim Baker, drejtor ekzekutiv i të dy organizatave, për DCNF. Pasi iu dërgua një kopje e ankesës, Baker nuk dha koment shtesë.

Përveç kritikave ndaj industrisë së kapitalit privat, PESP dhe disa prej punonjësve të saj janë shprehur ashpër edhe kundër Izraelit gjatë konfliktit të tij në vazhdim me Hamasin.

Në një postim në blog nga shkurti 2024, PESP i referohej sulmit të 7 tetorit, gjatë të cilit civilë izraelitë u vranë dhe u morën peng nga terroristët e Hamasit, thjesht si “viktimat dhe pengjet e 7 tetorit,” ndërsa reagimin e Izraelit e përshkruante si “krime lufte ndaj civilëve” dhe e quante “aparteid”. Disa punonjës të nivelit të lartë në PESP kanë lavdëruar gjithashtu protestat dhe kampet studentore anti-Izrael nëpër universitete në mbarë SHBA-në. / IJR