SHBA dhe Japonia nënshkruajnë marrëveshje tregtare historike prej 550 miliardë dollarësh, Trump: Më e madhja ndonjëherë

Shtetet e Bashkuara dhe Japonia kanë arritur një marrëveshje tregtare me vlerë 550 miliardë dollarë, që presidenti Donald Trump e cilësoi si “ndoshta marrëveshja më e madhe ndonjëherë”. Lajmin e bëri të ditur vetë kreu i Shtëpisë së Bardhë të martën vonë përmes një postimi në platformën X (ish-Twitter), ku theksoi se kjo marrëveshje do të sjellë përfitime të jashtëzakonshme për ekonominë amerikane.

Sipas presidentit Trump, Japonia do të investojë 550 miliardë dollarë në Shtetet e Bashkuara, nga të cilat 90% e fitimeve do të mbeten në ekonominë amerikane. Ai premtoi se marrëveshja do të krijojë “qindra mijëra” vende të reja pune dhe e cilësoi si një hap vendimtar në hapjen e tregjeve japoneze për produktet amerikane.

Marrëveshja përfshin gjithashtu tarifa reciproke prej 15% mes dy vendeve, ndërsa Tokio ka pranuar të hapë tregun e vet për një gamë të gjerë mallrash, përfshirë automjete, produkte bujqësore si orizi, dhe mallra të tjerë.

“Kjo është një kohë shumë emocionuese për Shtetet e Bashkuara të Amerikës,” shkruan Trump, duke shtuar se marrëdhëniet mes dy vendeve do të mbeten të shkëlqyera edhe në të ardhmen. Marrëveshja shihet si një sukses i madh në agjendën tregtare të administratës amerikane.