Tulsi Gabbard akuzon hapur Obamën se ka dashur të bëjë grusht shteti kundër Trump-it

Tulsi Gabbard ka akuzuar hapur administratën e ish-presidentit Barack Obama për nisjen e një “grushti shteti shumëvjeçar” kundër presidentit Donald Trump, në një përpjekje për të përmbysur fitoren e tij në zgjedhjet e vitit 2016.

Gabbard publikoi të premten email-e të deklasifikuara dhe pretendoi se ato zbulojnë një “konspiracion për tradhtie” të kryer nga Obama dhe zyrtarë të tij lidhur me hetimet për ndërhyrjen ruse në zgjedhjet e vitit 2016.

Trump promovoi këtë “konspiracion” gjatë fundjavës në rrjetin e tij Truth Social, duke shpërndarë një intervistë që Gabbard dha për Fox News lidhur me akuzat. Në një postim të veçantë të shtunën, ai gjithashtu e përgëzoi atë.

“Qëllimi i tyre ishte të përmbysnin vullnetin e popullit amerikan dhe të realizonin praktikisht një grusht shteti shumëvjeçar, me synimin për të penguar presidentin që të përmbushte mandatin që i ishte dhënë nga qytetarët,” tha Gabbard për administratën Obama.

Demokratët e kanë dënuar akuzën, duke e cilësuar si përpjekje për të “ndryshuar temën” nga mënyra se si administrata Trump po e trajton çështjen e dosjeve të Jeffrey Epstein-it. Presidenti është përballur me zemërimin e përkrahësve të linjës së ashpër MAGA për shkak të vendimit të Departamentit të Drejtësisë për të mos publikuar më shumë prova në rastin e pedofilit të dënuar. Trump ka urdhëruar prokuroren e përgjithshme, Pam Bondi, që të publikojë disa nga dosjet që lidhen me dëshmitë e jurisë së madhe.  

Gabbard ka kërkuar ndjekjen penale të Obamës dhe ish-zyrtarëve të lartë të sigurisë kombëtare të SHBA-së, duke i akuzuar për “sajim informacioni” për të sugjeruar se Rusia ndërhyri në zgjedhjet e vitit 2016, ndonëse, sipas saj, provat tregojnë të kundërtën.

Në memorandumin e Drejtorit të Inteligjencës Kombëtare (DNI) përmenden ish-drejtori i Inteligjencës Kombëtare James Clapper, ish-drejtori i CIA-s John Brennan dhe ish-drejtori i FBI-së James Comey.

Trump ka pretenduar për vite se hetimi për ndërhyrjen ruse ishte një “mashtrim”.

Komuniteti amerikan i inteligjencës ka arritur prej kohësh në përfundimin se Rusia u përpoq të ndikonte zgjedhjet e vitit 2016 përmes një fushate në rrjetet sociale, megjithatë hetimi i Mueller-it nuk arriti të provonte se agjentët rusë kishin lidhje të drejtpërdrejta me fushatën e Trump-it.

Kongresisti demokrat Jim Himes nga Connecticut e quajti pretendimin e Gabbard-it “marrëzi të plotë”.

“Është e çuditshme që ish-drejtori i CIA-s, Pompeo, nuk tha asgjë për këtë. Ose që asnjë nga gjashtë drejtorët e inteligjencës në mandatin e parë të Trump-it nuk e përmendi,” shkroi Himes në një postim në X. “Përsëri, @DNIGabbard po sulmon njerëzit e saj në përpjekje për të rifituar simpatinë e Trump-it ose për të tërhequr vëmendjen nga skandali Epstein. Ndoshta të dyja.”

Ai shtoi: “Askush nuk pretendon se rusët sulmuan teknologjinë e votimit. Por të gjitha hetimet, përfshirë atë dypartiak të Senatit, konkluduan se rusët u përpoqën të ndikojnë zgjedhjet e 2016 në favor të Trump-it.”

Senatori demokrat Mark Warner, nënkryetar i Komitetit të Inteligjencës në Senat, e akuzoi Gabbard-in për përdorim politik të postit të saj si drejtoreshë e inteligjencës kombëtare në administratën Trump.

“Nuk është për t’u habitur që DNI Gabbard, e cila premtoi se do ta depolitizonte komunitetin e inteligjencës, po e përdor sërish postin e saj për të amplifikuar teoritë e konspiracionit të presidentit për zgjedhjet,” tha Warner në X. “Është tronditëse të dëgjosh që DNI Gabbard akuzon forcat e saj të inteligjencës për një ‘konspiracion tradhtie’ ndërkohë që ajo vetë nuk pati guximin ta quante Edward Snowden-in tradhtar.” Obama nuk ka reaguar ende ndaj pretendimeve të Gabbard-it. / Independent