Organizatorët italianë njoftuan të hënën se po anulojnë koncertin e dirigjentit pro-Kremlinit, Valery Gergiev pas një proteste politike.

Gergiev, i cili është një mbështetës i flaktë i sundimtarit rus Vladimir Putin, ishte planifikuar të performonte në  festivalin e madh Un’Estate da Re në Pallatin Mbretëror të shekullit të 18-të të Casertës, pranë Napolit, më 27 korrik. Do të kishte qenë koncerti i tij i parë në Bashkimin Evropian, që nga fillimi i pushtimit të plotë të Ukrainës nga Rusia tre vjet më parë.

Përfshirja e Gergiev në program shkaktoi shumë kritika javën e kaluar. Shfaqja "rrezikon të dërgojë mesazhin e gabuar", tha Ministri i Kulturës i Italisë, Alessandro Giuli. Yulia Navalnaya, gruaja e ish-liderit të opozitës ruse, Alexei Navalny, gjithashtu foli kundër kësaj.

Gergiev mbështet aneksimin e Gadishullit të Krimesë të Ukrainës nga Rusia në vitin 2014 dhe drejtoi koncerte nacionaliste, pasi Rusia pushtoi rajonin gjeorgjian të Osetisë së Jugut në vitin 2008. Pasi Putini nisi pushtimin e tij të plotë të Ukrainës në vitin 2022, teatrot dhe festivalet kryesore të operës në të gjithë Evropën i ndërprenë lidhjet me Gergievin.

Ukraina dhe disa vende brenda BE-së vazhdimisht ua kanë ndaluar këngëtarëve të shquar të operës pro-Kremlinit të performojnë, duke argumentuar se ata janë pjesë e makinës propagandistike të Rusisë dhe nuk duhet të shihen të ndarë nga agjenda imperialiste e Kremlinit.

Komisioni Evropian u përfshi gjithashtu, duke i kërkuar një organizatori spanjoll të sigurohej që asnjë financim nga BE nuk po rridhte për koncertet që kishin Gergievin në program./ Politico.