Faksionet palestineze dënuan të dielën atë që e cilësuan si një “luftë urie dhe gjenocidi” që po ushtrohet ndaj popullit palestinez në Rripin e Gazës, duke e bërë Izraelin dhe Shtetet e Bashkuara përgjegjëse për këtë agresion.

Në një deklaratë të përbashkët për mediat, grupet palestineze thanë se agresioni izraelit ka kaluar çdo kufi, nga bombardimet dhe shkatërrimi i infrastrukturës, te bllokada e rreptë dhe mohimi i qëllimshëm i ndihmave ushqimore dhe mjekësore për mbi dy milionë banorë të rrethuar në Gaza.

Ato akuzuan qeverinë e kryeministrit Benjamin Netanyahu për krime sistematike kundër njerëzimit, duke u mbështetur drejtpërdrejt nga administrata amerikane dhe me një heshtje të “dyshimtë” nga Bashkimi Evropian.

Sipas deklaratës, veprimet e Izraelit në Gaza përbëjnë krime lufte dhe krime kundër njerëzimit, më të egra dhe më sadiste se ato të regjimeve naziste dhe fashiste në historinë moderne.

Faksionet theksuan se Izraeli nuk ka asnjë interes për armëpushim apo qetësim, por synon spastrimin etnik të territorit përmes dëbimit të popullsisë vendase.

Ato paralajmëruan gjithashtu se vijimi i këtyre politikave jo vetëm që rrezikon çdo proces negociator, por mund të çojë drejt destabilizimit të mëtejshëm të rajonit, për të cilin mbajnë përgjegjësi të plotë Izraeli dhe aleatët e tij ndërkombëtarë.

Në fund, faksionet u bënë thirrje popullit palestinez brenda dhe jashtë vendit, si edhe kombeve arabe, islame dhe të gjithë njerëzve të lirë në botë, që të rrisin përpjekjet popullore, mediatike dhe politike për të ndalur krimet izraelite dhe për të thyer rrethimin e Gazës.