Instituti i Tony Blair (TBI) është përfshirë në një plan të debatueshëm për Gazën që kritikët e përshkruajnë si një projekt për spastrim etnik, pasi një hetim i Financial Times zbuloi se institucioni i themeluar nga ish-kryeministri britanik mori pjesë në hartimin e një plani për zhvendosjen masive të palestinezëve dhe shndërrimin e enklavës së rrethuar në një zonë luksoze investimi, të quajtur “Gaza Riviera”.

Plani u zhvillua nga biznesmenë izraelitë dhe u modelua nga Boston Consulting Group (BCG), e cila përllogariti koston e “relokimit” të deri në 500 mijë palestinezëve nga Gaza, përmes paketave ekonomike prej 9 mijë dollarësh për person – masa që, edhe pse të paraqitura si “vullnetare”, janë kritikuar gjerësisht si një skemë e fshehtë për spostimin e popullsisë.

Sipas dokumenteve të siguruara nga FT, punonjës të Institutit Tony Blair morën pjesë në grupe mesazhesh dhe thirrje planifikimi ku qarkullonin ide për transformimin ekonomik të Gazës pas luftës, përfshirë ndërtimin e ishujve artificialë të ngjashëm me Dubain, zona tregtare me bazë në blockchain dhe qendra prodhimi me taksa të ulëta. Edhe pse TBI është distancuar nga dokumenti final i titulluar “The Great Trust”, ka pranuar që dy punonjës të saj morën pjesë në diskutime që përfshinin propozime për transformime të mëdha strukturore.

Ndërkohë, BCG ishte kontraktuar nga Orbis – një kompani me bazë në Uashington – për të ndihmuar në krijimin e Gaza Humanitarian Foundation (GHF), një projekt ndihme i mbështetur nga Izraeli dhe SHBA, që tashmë është zhytur në polemika pas vrasjes së mbi 600 palestinezëve që kërkonin ushqim. Organizatat humanitare e kanë bojkotuar këtë iniciativë, ndërsa OKB e ka quajtur GHF një “gjethe fiku” për qëllimet ushtarake izraelite.

Në modelet e saj të brendshme, BCG përllogariste se zhvendosja e palestinezëve nga Gaza kushtonte 23 mijë dollarë më pak për person sesa ndihma për ta brenda territorit. Një prej skenarëve parashikonte se 25% e popullsisë – rreth 500 mijë vetë – do të largoheshin “vullnetarisht” në këmbim të një shume të caktuar, çka ka shkaktuar shqetësime për shkelje të së drejtës ndërkombëtare që ndalon transferimin e detyruar të popullsive.

Projekti iu paraqit figurave në administratën e presidentit Donald Trump, i cili më herët kishte propozuar transformimin e Gazës në “Rivierën e Lindjes së Mesme”, bashkë me zhvendosjen e banorëve të saj. Ish-agjenti i CIA-s, Phil Reilly, që tani drejton sigurinë për GHF, thuhet se ia prezantoi projektin Tony Blair-it në mars, ndërsa TBI thotë se Blair ishte “në modalitet dëgjimi”, por pranon se stafi i tij shqyrtoi planin ekonomik.

Përfshirja e TBI-së në këtë skemë ka ngritur alarme për ndërlikimin e saj në një strategji të gjerë për të rishkruar përbërjen demografike të Gazës nën maskën e rindërtimit ekonomik.