SHBA - Guvernatori i Maryland ka dhënë hollësira mbi planin e tij për të pastruar rrënojat pasi një anije mallrash goditi një urë kryesore në Baltimore, duke vrarë gjashtë persona.

Për të ndihmuar, administrata Biden ka miratuar 60 milion dollarë fonde emergjente që Maryland i kishte kërkuar.

Guvernatori Wes Moore tregoi se si ata synonin të pastronin mbeturinat, të hiqnin anijen, të nxirrnin pjesë të urës dhe ta rindërtonin atë. "Ne kemi një punë shumë të madhe për të bërë," tha ai.

Duke folur së bashku me ligjvënësit në një konferencë shtypi të enjten, zoti Moore përshkroi planet për secilën fazë të procesit, të cilat ai tha se do të paraqesin disa sfida.

Si fillim, tha guvernatori, anija e ngarkesave që goditi urën Francis Scott Key - e quajtur Dali - është pothuajse aq e gjatë sa Kulla Eifel.

Ai e krahasoi situatën me incidentin e vitit 2021, në të cilin u deshën pesë javë për të hequr një anije mallrash që u bllokua në Kanalin e Suezit. Dallimi këtu, tha guvernatori, është se Ura Key është sipër anijes.

"Ne po flasim për 3,000 deri në 4,000 ton çelik që ka rënë mbi atë anije," tha zoti Moore.

Ai shtoi se ujërat e lumenjve ishin të errëta dhe mbeturinat në ujë aq të dendura sa që zhytësit nuk mund të shihnin më shumë se një ose dy këmbë larg para tyre.

 “Këta zhytës kanë qenë metodikë, kanë qenë të disiplinuar, kanë qenë të guximshëm, duke u zhytur në atë errësirë me objekte përreth tyre”.

Shteti ka kërkuar një mori burimesh për të ndihmuar në procesin e pastrimit.

Korpusi i Inxhinierëve të Ushtrisë Amerikane po mbulon koston e pastrimit të kanalit dhe ka 32 anëtarë të personelit dhe 38 kontraktorë të marinës amerikane në terren, tha senatori demokrat i Maryland, Chris Van Hollen.

Ai shtoi se një vinç 1,000 tonësh - më i madhi në bregun lindor të SHBA-së - do të mbërrinte rreth orës 0:00 EST (04:00 GMT) të premten për të ndihmuar në heqjen e mbeturinave.

Një vinç 400 tonësh do të vinte më pas të shtunën për të ndihmuar më tej në pastrimin e mbeturinave.

Ndërkohë, ata që janë të përfshirë në procesin e pastrimit duhet të kuptojnë se si të presin mbeturinat nga ura në copa, në mënyrë që ato të mund të ngrihen nga vinçi, tha kundëradmirali Shannon Gilreath i Rojës Bregdetare të SHBA.

Autoritetet kanë vendosur gjithashtu pritë 2,400 këmbë të gjatë në ujë  për të mos lejuar rrjedhjen e lëndëve të rrezikshëm nga anija, tha zoti Moore.

Anija Dali mbante mijëra kontejnerë mallrash në bord, duke përfshirë 56 kontejnierë që mbanin materiale të rrezikshme, thanë zyrtarët, si bateri litiumi dhe parfume, sipas guvernatorit.

Duke folur me gazetarët të mërkurën, Jennifer Homendy, kryetare e Bordit Kombëtar të Sigurisë së Transportit, tha se 764 ton materiale kryesisht gërryese dhe të ndezshme u identifikuan në varkë.

Zoti Moore tha se shteti po planifikon gjithashtu të sigurojë mbështetje ekonomike për punëtorët, vendet e punës të të cilëve janë prekur nga përplasja - rreth 8,000 njerëz, sipas qeverisë..

Kostoja e rikuperimit nuk do të jetë e lirë, sipas analistëve, por shteti ka të drejtë për më shumë fonde federale të ndihmës emergjente përveç 60 milion dollarëve që ka marrë tashmë, tha Van Hollen.

Ai tha se paratë do të ndihmonin në mbulimin e pjesës më të madhe të rindërtimit të urës".

Z. Van Hollen tha se do të prezantojë legjislacionin për të mbuluar pjesën e mbetur të kostove të rikuperimit. Presidenti Joe Biden ka thënë më parë se qeveria federale duhet të paguajë faturën për rindërtimin e urës.