Departamenti i Drejtësisë në SHBA akuzoi kompaninë Apple se ka monopolizuar tregun e smartfonëve, në një proces gjyqësor të rëndësishëm kundër gjigantit të teknologjisë. Sa rrezikon kompania e famshme nga kjo padi?

BBC

Anne Witt, profesoreshë e drejtësisë në shkollën e biznesit EDHEC në Francë, thotë se vendimi mund të përmblidhet thjesht si “një lajm jo i mirë për Apple” - por ajo gjithashtu thotë se ka një ndryshim thelbësor midis kësaj padie dhe gjobës që vendosi Bashkimi Europian ndaj Apple.

“Ndërsa agjencitë evropiane të konkurrencës hetojnë dhe vendosin për rastin, autoritetet amerikane antitrust nuk e kanë këtë fuqi – por duhet të bindin një gjyqtar se kompania ka deformuar konkurrencën”.

“Kjo është jashtëzakonisht e vështirë për t'u bërë dhe hera e fundit që një gjykatë amerikane shpalli fajtore për monopol një kompani ‘Big Tech’ daton që nga viti 2001... pa dyshim që Apple do të luftojë në gjykatë akuzat e Departamentit të Drejtësisë të SHBA”.

Ajo thotë se padia është një shenjë se gjërat po “bëhen shumë të pakëndshme” për firmat e mëdha të teknologjisë si Apple, pas veprimeve të ngjashme diku tjetër.

“Ndërsa autoritetet amerikane antitrust ishin më të ngadalta për të shqyrtuar se sa homologët e tyre evropianë, gjërat ndryshuan në vitin 2019, kur Departamenti i Drejtësisë i SHBA dhe Komisioni Federal i Tregtisë i SHBA (FTC) ndanë detyrën për hetimin e [firmave të mëdha të teknologjisë] sipas ligjeve amerikane antitrust”.

“Departamenti i Drejtësisë mori Google dhe Apple, dhe FTC mori Facebook dhe Amazon, dhe tani ka padi në pritje kundër të katër kompanive”.

“Implikimet e mundshme janë shumë serioze – ndërkohë që Komisioni Evropian tenton të vendosë gjoba financiare, autoritetet amerikane antitrust po ndjekin mjete juridike strukturore në disa nga këto raste... që do të thotë se ata po kërkojnë nga gjykatat që të copëzojnë këto kompani”.