Një grup prej 18 ligjvënësish republikanë i kanë kërkuar presidentit amerikan Joe Biden të fshijë llogarinë e tij TikTok, duke përmendur shqetësimet e sigurisë kombëtare.

Në letrën e tyre, ligjvënësit theksojnë se Biden “po injoron rreziqet e njohura të sigurisë të paraqitura nga TikTok. Si mund t’i paralajmërojë qeveria federale amerikanët për rreziqet e aplikacionit kur kreu i shtetit po e përdor atë?”

Fushata e demokratit krijoi së fundmi një llogari në TikTok, ku ai ngarkoi për herë të parë video më 11 shkurt, duke synuar të tërheqë votuesit më të rinj. Videoja e parë ka 9.6 milionë shikime deri më tani, ndërsa llogaria e Biden ka 162,000 ndjekës.