Kryeministri izraelit, Benjamin Netanyahu ka thënë se qeveria e tij do të votojë për një “vendim deklarativ” në lidhje me kundërshtimin e Izraelit ndaj çdo imponimi të njëanshëm të shtetësisë palestineze.

Netanyahu tha në fillim të mbledhjes javore të kabinetit se masa vjen pas “bisedimeve të fundit në komunitetin ndërkombëtar për një përpjekje për t’i imponuar Izraelit në mënyrë të njëanshme një shtet palestinez”, shkruan Al Jazeera.

Deklarata zyrtare, theksoi ai, do të pasqyronte se: “Izraeli kundërshton diktatet e drejtpërdrejta ndërkombëtare në lidhje me një marrëveshje të përhershme me palestinezët. Një marrëveshje e tillë mund të arrihet vetëm në negociata të drejtpërdrejta ndërmjet palëve, pa parakushte”.

Kërkesa që qeveria të dalë kundër të tjerëve që të njohin një shtet palestinez vjen pas një raporti të Washington Post se Shtetet e Bashkuara dhe partnerët arabë po planifikonin të publikonin një propozim që vendoste një “afat kohor të fortë” për krijimin e një shteti palestinez.