“New York Times” ka paditur OpenAI dhe Microsoft për shkelje të së drejtave të autorit, duke pretenduar se teknologjia e inteligjencës artificiale të kompanive kopjoi në mënyrë të paligjshme miliona artikuj të “Times” për të sprovuar ChatGPT dhe shërbime të tjera, për t'u ofruar njerëzve akses të menjëhershëm në teknologjinë e informacionit e që tani konkurron me Times.

Ankesa është e fundit në një varg padish që synojnë të kufizojnë përdorimin e supozuar të gërvishtjes së pjesëve të mëdha të informacioneve nga i gjithë interneti - pa kompensim - për të stërvitur të ashtuquajturat modele të inteligjencës artificiale.

Aktorët, shkrimtarët, gazetarët dhe tipa të tjerë krijues që postojnë veprat e tyre në internet kanë frikë se inteligjenca artificiale do të mësojë nga materiali i tyre dhe do të ofrojë “chatbot” dhe burime të tjera informacioni, konkurruese këto,  pa i kompensuar siç duhet ata.

Por padia e “Times” është e pari ndër botuesit kryesorë mediatikë që përballet me OpenAI dhe Microsoft, markat më të njohura të inteligjencës artificiale. Microsoft (MSFT) ka një vend në bordin e OpenAI dhe një investim shumë miliardë dollarësh në kompani.

Në një kallëzim të paraqitur të mërkurën, “Times” tha se e ka për detyrë që t’i informojë abonentët e saj, por "përdorimi i paligjshëm i punës së “The Times” nga Microsoft dhe OpenAI për të krijuar produkte të inteligjencës artificiale që konkurrojnë me të, e kërcënon aftësinë e “The Times” për të ofruar atë shërbim".

Gazeta vuri në dukje se OpenAI dhe Microsoft përdorën burime të tjera në "kopjimin e tyre në shkallë të gjerë", por "ata i dhanë theks të veçantë përmbajtjeve të “Times" duke kërkuar "të përdorin falas investimin masiv të “The Times” në gazetarinë e saj duke e përdorur atë për të ndërtuar produkte zëvendësuese, pa leje apo pagesë.”

"Ne respektojmë të drejtat e krijuesve dhe pronarëve të përmbajtjes dhe jemi të përkushtuar të punojmë me ta për të siguruar që ata të përfitojnë nga teknologjia e inteligjencës artificiale dhe modelet e reja të të ardhurave," tha OpenAI në një deklaratë nga zëdhënësja Lindsey Held.

“Bisedat tona të vazhdueshme me New York Times kanë qenë produktive dhe kanë ecur përpara në mënyrë konstruktive, kështu që ne jemi të befasuar dhe të zhgënjyer me këtë zhvillim. Ne shpresojmë se do të gjejmë një mënyrë reciproke të dobishme për të punuar së bashku, siç po bëjmë me shumë botues të tjerë.”

Kurse Microsoft nuk iu përgjigj një kërkese për koment mbi padinë./ar.sh/SYRI.NET

​