Në korridoret e mbushura me njerëz të spitalit evropian në Khan Younis, mjekët e rraskapitur vendosin se kush nga fluksi i madh i pacientëve që vijnë nga veriu i Gazës duhet të jetojë ose të vdesë.

Qindra viktima janë zhvendosur në jug ditët e fundit pas evakuimit të spitaleve në qytetin e Gazës dhe stafi mjekësor tashmë po lufton me mungesën akute të ilaçeve, pakësimin e racioneve ushqimore dhe furnizimin me energji dhe komunikim të ndërprerë. Të lënduarit i janë bashkuar mijëra njerëzve të zhvendosur që kërkojnë strehim dhe siguri në objektet mjekësore.

Paul Ley, një kirurg ortopedik në spitalin evropian, tha se njerëzit e zhvendosur po flinin në ashensorë, një ekip i vogël po punonte gjatë gjithë orarit në katër salla operative për të amputuar gjymtyrët e infektuara me ditë të tëra pa trajtim dhe kishte një mungesë akute të qetësuesve.

Vendimet e triazhit duhej të merren menjëherë, gjë që, në një rast, nënkuptonte që një fëmijë 12-vjeçar të vdiste vetëm me kujdes paliativ, në mënyrë që të ruheshin burimet në pakësim. Ley tha se spitali kishte pranuar 500 pacientë të evakuuar nga spitalet në veri të Gazës në ditët e fundit.

“Shumë prej tyre nuk kanë marrë trajtim për nëntë apo 10 ditë sepse spitalet atje ishin jofunksionale edhe nëse ishin të hapura. Kjo është situata që po ndodh këtu tani. Ky është një spital funksional, por ne jemi të mbingarkuar. Nuk ka ku të evakuohet… Nuk ka rrugë shpëtimi. Ne jemi ndoshta një nga linjat e fundit të mbrojtjes,” deklaroi Ley.

Në njësinë e djegieve të spitalit europian janë 78 pacientë, gati dy të pestat e tyre fëmijë nën pesë vjeç. Një problem tjetër është mungesa e anestetikëve dhe ilaçeve kundër dhimbjeve dhe mjeku Ley pranon se operacionet bëhen me anestezi minimale, ka mungesë analgjezikësh çka e bën punën shumë të vështirë për pacientët e sëmurë.