Sekretari Amerikan i Shtetit, Antony Blinken ndodhet në Jordani nga ku dha një konferencë për shtyp me ministrat e jashtëm të këtij vendit dhe të Egjiptit. Ministri i Jashtëm jordanez dhe zëvendëskryeministri Ayman Safadi, tha se bisedimet midis Sekretarit të Shtetit dhe ministrave të jashtëm arabë ishin “të ndershme, të drejtpërdrejta dhe gjithëpërfshirëse”. Ai vuri në dukje gjithashtu “vullnetin e ndërsjellë” për të “ndaluar atë që mund ta përshkruajmë si një katastrofë që do ta ndjekë rajonin për një brez”.

Safadi thotë se pikat e marrëveshjes midis SHBA-së dhe shteteve arabe përfshijnë rëndësinë e dhënies së ndihmës humanitare, mbrojtjen e civilëve dhe ndjekjen e ligjit ndërkombëtar humanitar. Ai gjithashtu thotë se kanë rënë dakord për refuzimin e shpërnguljes së palestinezëve nga toka e tyre. “Të gjitha vendet arabe kërkojnë një armëpushim të menjëhershëm që do t’i japë fund kësaj lufte”, shton Safadi, duke thënë se ata nuk pranojnë që Izraeli po vepron për vetëmbrojtje. Ai tha se vrasja e civilëve, shkatërrimi i spitaleve, xhamive dhe “nuk mund të justifikohet dhe nuk do të sjellë siguri në Izrael apo paqe në rajon”.

Blinken: Nuk mund të kthehemi në status quo

Blinken pohon qëndrimin e SHBA-së se Izraeli ka të drejtë të mbrohet kundër Hamasit. Por, shton ai, “duhet të marrë çdo masë të mundshme për të parandaluar viktimat civile”. Duke vepruar kështu, ai thotë se kjo do të parandalojë Hamasin nga shfrytëzimi i mëtejshëm i situatës dhe është gjithashtu “gjëja e duhur dhe morale për të bërë”, thotë Blinken. “Ajo që duhet të bëjmë është të parandalojmë dehumanizimin e njëri-tjetrit”, u thotë Blinken gazetarëve. “Kur nuk e bëjmë këtë, ne bëjmë punën e Hamasit për ta,” shton ai. Blinken thotë se SHBA beson se të gjitha këto përpjekje do të lehtësoheshin nga “pauza humanitare”. Ai thotë se ka diskutuar me zyrtarët izraelitë se si dhe ku mund të zbatohen këto dhe çfarë duhet bërë për t’i bërë ato të mundshme. Ai thotë se SHBA vazhdon të besojë në zgjidhjen me dy shtete, duke shtuar se “ne të gjithë e kuptojmë se nuk mund të kthehemi në status quo”.

Egjipti thirrje për armëpushim ‘të menjëhershëm’

Ministri i Jashtëm egjiptian Sameh Shoukry thotë se Egjipti po bën të gjitha përpjekjet e tij për të ofruar ndihma dhe për të trajtuar banorët e plagosur të Gazës, duke shtuar se vendi do të vazhdojë përpjekjet e tij. Ai riboton thirrjen e kombeve arabe për një armëpushim “të menjëhershëm dhe intensiv” në Gaza “pa asnjë kusht”. Ai tha se gjatë bisedimeve të tij me Antony Blinken e paralajmëroi kundër “standardeve të dyfishta”. Ai tha se nuk duhet të ketë dënime për shënjestrimin e civilëve dhe shkelje të së drejtës ndërkombëtare humanitare që nuk zbatohen në të njëjtën mënyrë “kur gjërat janë të lidhura me çështjen palestineze… sikur gjaku arab është më i vogël se gjaku i njerëzve të tjerë”.

Një e ardhme pa Hamasin për Gazën?

Një element kyç i konferencës për shtyp ishin thirrjet nga Egjipti dhe Jordania për një armëpushim të menjëhershëm, por Blinken e bëri të qartë se SHBA nuk e mbështesin këtë kërkesë. “Një armëpushim tani thjesht do ta linte Hamasin në vend, në gjendje të rigrupohet dhe të përsërisë atë që bëri më 7 tetor,” iu përgjigj ai një pyetjeje mbi këtë çështje.

“Vetëm disa ditë më parë, një zyrtar i lartë i Hamasit tha se qëllimi i tyre ishte të bënin 7 tetorin përsëri dhe përsëri dhe përsëri. Asnjë komb, askush nga ne nuk mund ta pranojë këtë.” Ministrat e Jashtëm egjiptian dhe jordanez u pyetën nëse ka pasur ndonjë diskutim për një të ardhme të Gazës pa Hamasin. Sameh Shoukry i Egjiptit tha se një diskutim i tillë do të ishte “i parakohshëm” dhe fokusi duhet të mbetet në situatën aktuale. Aiman Safadi i Jordanisë tha se fokusi tani ishte në “ndalimin e kësaj lufte” dhe nuk ishte e mundur të mendohej për të ardhmen kur nuk ishte e qartë “çfarë lloj Gaza do të mbetet”. “A do të flasim për një tokë djerrinë? A do të flasim për një popullsi të tërë refugjate?”, pyet ai. Safadi ishte i qartë se një vështrim “gjithëpërfshirës” i konfliktit ishte i nevojshëm dhe se diskutimet për “kthimin e zgjidhjes me dy shtete” ishin të nevojshme.