Presidenti autoritar i Bjellorusisë ftoi kryeministrin e Hungarisë të vizitojë vendin e tij, i cili është përballur me izolim në rritje për shkak të goditjes së pamëshirshme të qeverisë ndaj disidencës dhe mbështetjes së luftës të aleates, Rusisë, në Ukrainë.

Presidenti Alexander Lukashenko i bëri ftesë kryeministrit Viktor Orban në një takim me Ministrin e jashtëm hungarez Peter Szijjarto, i cili mbërriti në Bjellorusi në fillim të kësaj jave.

Lukashenko shprehu gatishmërinë "për një dialog me vendet evropiane" dhe ftoi Orbanin "për të diskutuar çështje serioze".

Shefi i shtypit i Orbanit, Bertalan Havasi, tha se kryeministri do ta shqyrtojë ftesën sapo të kthehet nga një samit i Bashkimit Evropian në Bruksel.

Bjellorusia është nën një breshëri sanksionesh perëndimore që nga viti 2020, kur Lukashenko fitoi mandatin e tij të gjashtë në zgjedhjet që Perëndimi dhe opozita i denoncuan si të manipuluara.

Votimi shkaktoi një valë të paprecedentë protestash masive, të cilave qeveria e Lukashenkos dhe agjencitë e zbatimit të ligjit u përgjigjën duke arrestuar më shumë se 35,000 njerëz dhe duke rrahur dhunshëm mijëra.

Izolimi i vendit u rrit pasi Rusia përdori Bjellorusinë, aleaten e saj prej një kohe të gjatë si një terren për të dërguar trupa dhe raketa në Ukrainë në vitin 2022.

Lukashenko kohët e fundit ka bërë thirrje për një normalizim të marrëdhënieve të Bjellorusisë me vendet anëtare të BE-së.

Hungaria është i vetmi vend i BE-së që ende bisedon me Bjellorusinë dhe mund të shërbejë si ndërmjetës midis Minskut dhe bllokut 27-vendesh, i cili ka vendosur sanksione ndaj dhjetëra zyrtarëve bjellorusë.

Ministri hungarez Szijjarto e vizitoi më parë Bjellorusinë në shkurt, duke u bërë zyrtari i parë i lartë evropian që e bën këtë që pas vitit 2020.