Izraeli njoftoi se ka arrestuar 37 anëtarë të Hamasit në bastisjet që ka kryer gjatë natës në Bregun Perëndimor.

Në total, Forcat e Mbrojtjes izraelite (IDF) thonë se që nga fillimi i luftës me hamasin më 7 tetor, kanë arrestuar 800 palestinezë të kërkuar në të gjithë Bregun Perëndimor, duke përfshirë më shumë se 500 të lidhur me Hamasin.

Kolona e tretë e ndihmës hyri në Gaza të hënën, thotë Gjysmëhëna e Kuqe

Një kolonë e tretë ndihmash thuhet se hyri në Rripin e Gazës të hënën, nën rrethimin dhe granatimet izraelite.

Një zyrtar anonim i Gjysmëhënës së Kuqe egjiptiane tha se gjithsej 34 kamionëve iu është dhënë tashmë akses midis të shtunës dhe të dielës; autokolonat e para këto që hynë që nga fillimi i luftës midis Izraelit dhe Hamasit.

Ndërkohë, kryediplomati i BE-së Josep Borrell bëri thirrje të hënën për "më shumë ndihmë dhe sa më shpejt" për Rripin e Gazës, të rrethuar nga ushtria izraelite, duke theksuar se çështja e një pauze humanitare do të debatohej nga 27 shtetet anëtare.

"Çfarë është e rëndësishme?! Më shumë ndihmë dhe sa më shpejt", këmbënguli ai, duke theksuar se disa dhjetëra kamionë që kishin kaluar nga Egjipti në Gaza ishin "të pamjaftueshëm".

“Personalisht, mendoj se është e nevojshme një pauzë humanitare për të lejuar shpërndarjen e ndihmave humanitare”, deklaroi ai gjatë mbërritjes në Luksemburg për takimin e ministrave të jashtëm të BE-së.