Vendimi i Presidentit Joe Biden për të vizituar Izraelin mbyll një javë diplomacie intensive amerikane që synon të mbështesë aleatin e saj më të ngushtë në Lindjen e Mesme dhe të përpiqet të parandalojë përhapjen e luftës së Izraelit me Hamasin në rajon, njofton BBC.

Amerikanët janë të shqetësuar se guximi i sulmit të Hamasit dhe egërsia e kundërofensive izraelite mund të ndezin dhunë në Bregun Perëndimor dhe më gjerë.

Presidenti amerikan do të bashkohet me Sekretarin e tij të Shtetit, Antony Blinken, i cili ka qenë në një lëvizje të furishme në Lindjen e Mesme.

Z. Blinken ka theksuar mbështetjen e plotë të SHBA-së për një përgjigje të fuqishme ndaj sulmit vdekjeprurës të Hamasit, i cili vrau më shumë se 1,400 izraelitë.

Por ai po përpiqet gjithashtu të zbusë viktimat civile në Gaza, enklavën që qeveriset nga grupi militant palestinez.

Izraeli ka vrarë tashmë rreth 3,000 palestinezë në sulmet e pamëshirshme ajrore dhe ka bllokuar ushqimin, ujin dhe energjinë elektrike për Gazën, duke e zhytur atë në një krizë humanitare.

"Blinken po përpiqet të fusë perin në gjilpërë," thotë David Schenker, ish-diplomati i lartë i departamentit të shtetit për Lindjen e Mesme. "Deri më tani, ai duket se ia ka dalë relativisht mirë. Por po bëhet gjithnjë e më e vështirë."

Theksi i zotit Blinken për mbrojtjen e civilëve u rrit gjatë turneut të tij të stuhishëm në aleatët arabë të Amerikës në fund të javës së kaluar, duke vizituar gjashtë shtete për tri ditë.

Ai donte që ata të dënonin qartë Hamasin për shkallën dhe brutalitetin e pashembullt të sulmit dhe shpresonte të kufizonte kritikat ndaj fushatës ushtarake të Izraelit.

Vetëm dy qeveri arabe - Bahreini dhe Emiratet e Bashkuara Arabe – e denoncuan Hamasin. Të tjerat mund ta kenë bërë këtë privatisht, sepse shumica janë armiqësore ndaj Hamasit në shkallë të ndryshme.

Në publik, megjithatë, ata u përqëndruan në tragjedinë humanitare që po shpaloset tashmë në Gaza.

Një operacion i gjatë tokësor izraelit mund të ngrejë popullsinë e tyre, e cila mbështet kauzën palestineze, duke kërcënuar stabilitetin në vendet e tyre dhe duke ngushtuar hapësirën diplomatike që kanë peshat e rënda arabe si Egjipti dhe Arabia Saudite për të qetësuar situatën./ar.sh/SYRI.NET