Ministri rus i Mbrojtjes Sergei Shoigu së fundmi i ka sugjeruar udhëheqësit të Koresë së Veriut Kim Jong Un që vendet e tyre të zhvillojnë stërvitje të përbashkëta detare me Kinën. Mediat e huaja shkruajnë se  Shoigu vizitoi Korenë e Veriut për 70-vjetorin e përfundimit të Luftës Koreane, e cila përkujtohet në Korenë e Veriut si “Dita e Fitores” në korrik, dhe u takua me Kim.

Shoigu mori pjesë në një ekspozitë të sistemeve të mbrojtjes së vendit me Kim-in, ku ekspozoheshin raketat balistike të ndaluara të Phenianit.

Shërbimi Informativ Kombëtar i Koresë së Jugut i tha Asamblesë Kombëtare se Shoigu duket se ishte takuar privatisht me Kim për të rënë dakord për një zgjerim të gjerë ushtarak. Sipas mediave Rusia dhe Koreja e Veriut së fundmi kanë bërë thirrje për lidhje të ngushta ushtarake, por Koreja e Veriut ka mohuar të ketë ndonjë “marrëveshje armësh” me Rusinë.

Zëdhënësi i Sigurisë Kombëtare të Shtëpisë së Bardhë, John Kirby, u tha gazetarëve muajin e kaluar se Shoigu ishte përpjekur të blinte municion artilerie gjatë vizitës së tij në Korenë e Veriut.

SHBA së fundmi vendosi sanksione ndaj tre subjekteve që i akuzon se janë të lidhura me marrëveshjet e armëve midis Koresë së Veriut dhe Rusisë.