Gjashtë persona kanë vdekur pasi një varkë me emigrantë u fundos në Kanalin Anglez, njofton BBC.

Një zëdhënëse nga autoriteti bregdetar francez Premar tha se pesë deri në 10 persona të tjerë janë të zhdukur, raporton AFP. Rojet bregdetare britanike dhe franceze kanë shpëtuar rreth 50 persona nga anija, thanë autoritetet.

Një numër njerëzish u panë duke u tërhequr nga një varkë shpëtimi, disa me barela, në portin e Dover, por shkalla e lëndimeve dhe numri i saktë mbetet i paqartë.

Në orët e para të së shtunës, një anije që kalonte fillimisht ngriti alarmin se një varkë e mbingarkuar ishte në vështirësi në brigjet e Sangatte, pranë Calais, thanë autoritetet franceze.

Kur anija franceze e shpëtimit mbërriti, ata panë shumë njerëz në det që bërtisnin për ndihmë. Anija e shpëtimit Dover, që ishte në Kanalin Anglez dhe po merrej me një varkë tjetër që transportonte emigrantë, iu bashkua operacionit të shpëtimit.

Ekipet e shpëtimit janë ende duke kontrolluar ujin për të gjetur ndonjë të mbijetuar dhe trupa pasi, shpesh, varkat janë aq të mbingarkuara sa është e vështirë të thuhet se sa njerëz janë në to.

Edhe pse incidenti ka ndodhur në territorin francez, në këto lloj operacionesh përfshihen shumë për të shpëtuar sa më shumë njerëz.

Një vullnetar, i cili ishte në një nga varkat e shpëtimit, i tha agjencisë së lajmeve Reuters se migrantët po përdornin këpucët për të nxjerrë ujin nga anija që po fundosej.

Anne Thorel tha se kishte "shumë" njerëz në bord.

Një prokuror francez i tha agjencisë së lajmeve AFP se i pari nga viktimat ishte një i ri afgan i moshës 25-30 vjeç.

Ekipet e shpëtimit thonë se kjo është hera e shtatë këtë javë që u është dashur të tërheqin njerëzit nga uji.

Enver Solomon, shefi ekzekutiv i Këshillit të Refugjatëve, falënderoi shpëtimtarët për përpjekjet e tyre, por i kërkoi qeverisë së Mbretërisë së Bashkuar të punonte në krijimin e një "sistemi të rregullt dhe njerëzor azili".

Kanali anglez është një nga korsitë më të rrezikshme dhe më të ngarkuara të anijeve në botë, me 600 cisterna dhe 200 tragete që kalojnë çdo ditë.