Athinë - Grekët shkojnë nesër, të dielën, në kutitë e votimit për zgjedhjet e dyta të përgjithshme brenda pesë javësh, ku lideri konservator Kyriakos Mitsotakis pritet të fitojë një mandat të ri me një diferencë të madhe.

Votimi i dytë të dielën vjen pasi zgjedhjet e para në maj nuk arritën të zgjidhnin një shumicë të plotë.

Vëzhguesit thonë se nuk ka gjasa të jetë kështu këtë herë.

Ish-kryeministri dhe udhëheqësi konservator i Demokracisë së Re, Kyriakos Mitsotakis, fitoi me një shumicë të madhe në raundin e parë dhe shkon në votimin e dytë për të përfituar nga ndryshimet e ligjit zgjedhor që favorizojnë partinë fituese.

Votimi më 25 qershor bëhet sipas rregullave të reja që i japin një bonus prej 25-50 vendesh, partisë fituese, në varësi të performancës së saj.

Mitsotakis e mbajti mitingun e tij të fundit zgjedhor në sheshin Sintagma në qendër të Athinës ku iu drejtua mbështetësve.

"Ju jeni shumë të njohur me mbështetjen e guximshme që qeveria jonë dha [gjatë pandemisë] për të mbajtur ekonominë dhe shoqërinë në këmbë, por në të njëjtën kohë duke mbajtur premtimet tona," i tha ai një turme që brohoriste.

Votimi i së dielës vjen disa ditë pasi qindra emigrantë vdiqën dhe u zhdukën në Greqinë jugore kur një peshkarexhë peshkimi e tejmbushur u përmbys dhe u fundos, duke ndezur kritikat mbi mënyrën se si autoritetet greke e trajtuan shpëtimin.

Por fatkeqësia bëri pak për të ulur epërsinë e Mitsotakis prej 20 pikësh në sondazhet e opinionit ndaj rivalëve të krahut të majtë.

Udhëheqësi i opozitës, Alexis Tsipras, kreu i partisë së krahut të majtë Syriza, shërbeu si kryeministër nga viti 2015 deri në vitin 2019 dhe tani, në moshën 48-vjeçare,  po lufton për mbijetesën e tij politike.

Tsipras, fushata e të cilit është e përqendruar në mbrojtjen e shërbimit shëndetësor dhe shtetit të mirëqenies, nuk ka arritur të përfitojë nga një seri skandalesh që e goditën Mitsotakis në fund të mandatit të tij, duke përfshirë zbulimin e përgjimeve të gazetarëve dhe politikanëve të lartë si dhe një aksident vdekjeprurës treni më 28 shkurt që ekspozoi masat e dobëta të sigurisë.

Ai që shpreson të zëvendësojë Tsiprasin si parti kryesore opozitare, është kreu i Pasok-ut dhe ish-deputeti Nikos Androulakis. Partia e tij ka bërë përparim në këtë drejtim, por analistët dhe sondazhet e opinionit sugjerojnë se ky skenar mund të dojë ca kohë për t'u realizuar.

Qendrat e votimit hapen të dielën në mëngjes, megjithatë procesi filloi që të shtunën (më 24 qershor) kur grekët që jetonin jashtë mund të votonin nga shteti ku banonin./ar.sh/SYRI.NET